ඇමෙරිකාවේ කැලිෆෝනියා ප‍්‍රාන්තයේ පිහිටි යොසිමයිට් ජාතික උද්‍යානයේ කඳවුරු ලා සිටි දසදහසකට ආසන්න සංචාරකයන් පිරිසකට මරණීය වෛරසයක් වැළදී ඇත්දැයි පරීක්ෂා කිරීමට එරට සෞඛ්‍ය බලධාරීහු පියවර ගෙන ඇති බව වාර්තා වේ. ඉකුත් සතියේදී මෙම වෛරසය වැළඳුණ සංචාරකයන් දෙදෙනකු මියයෑමෙන් අනතුරුව ජාතික උද්‍යනයේ එක් ප‍්‍රදේශයක් වසා දැමීමට බලධාරීහු කටයුතු කළහ. හැන්ටා වෛරස් පුල්මොනරි සින්ඩ්‍රෝම් නමැති ශ්වසන පද්ධතිය ආශි‍්‍රතව වැළඳෙන දුර්ලභ ගණයේ මෙම රෝගය වැළඳුණු තවත් සංචාරකයන් හය දෙනකු වාර්තා වූ බව කැලිෆෝනියා උද්‍යාන බලධාරීහු පවසති. මෙම සිදුවීම වාර්තා වීමෙන් පසුව එම උද්‍යානයට පැමිණි සංචාරකයන් දසදහසක් පමණ එම වෛරසය වැළඳී ඇත්දැයි පරීක්ෂා කිරීමට පියවරගෙන තිබේ.