දශක ගණනකට පසු වඩාත්ම තරගාකාරී සහ අවිනිශ්චිතම ජනාධිපතිවරණයට ප්‍රංශය ඉරිදා (23) වැනිදා මුහුණ දෙයි. ඉකුත් දා ජිහාද්වාදියකු එල්ල කරන ලද ප්‍රහාරයකින් පොලිස් නිලධාරියකු මරණයට පත්වීමෙන් පසු දැඩි ආරක්ෂාවක් යටතේ මෙවර ජනාධිපතිවරණය පැවැත්වෙයි.

ප්‍රංශයේ පැරිස් නුවර ලෝ ප්‍රකට චෑම්ප්ස් එලිසීස්හිදි එම ප්‍රහාරය එල්ල වූ අතර ලොවටම තර්ජනයක් වී තිබෙන ඉස්ලාමික් ස්ටේට් සංවිධානය ප්‍රහාරය වගකීම බාරගත්තයේ. මෙම ප්‍රහාරය එල්ල වූයේ මාස නවයක නිහඬතාවකින් පසුය. ප්‍රංශයට අවසන් වරට ත්‍රස්ත ප්‍රහාරයක් එල්ල වූයේ ඉකුත් අගෝස්තු මාසයේදීය.

පිහියක් අතැතිව තර්ජනය කළ පුද්ගලයකුද සෙනසුරාදා දිනයේදී පැරිස් නුවරදී පොලිස් අත්අඩංගුවට පත්විය.  රටේ කොටස් මතවාදීව බෙදී සිටින සහ යුරෝපය සංගමය තුළ තවදුරටත් කටයුතු කරනවාද නැද්ද යන්න සම්බන්ධයෙන් අර්බුදයක් නිර්මාණය තිබෙන අවස්ථාවක ප්‍රංශයේ ජනාධිපතිවරණය පැවැත්වෙයි.  මෙම ජනාධිපතිවරණයේ ප්‍රංශයේ අනාගතය තීරණය කිරීම සඳහා ඉතාමත් තීරණාත්මකය.

මොන අපේක්ෂකයාට ඡන්දය ලබාදෙන්නේද යන්න සම්බන්ධයෙන් ඡන්ද දායකයන්ගෙන් හතරෙන් එකක් සෙනසුරාදා දිනය වනවිටත් නිශ්චිතව තීරණය කර නැතැයි සමීක්ෂණ වාර්තා සඳහන් කළ අතර ප්‍රංශ වැසියන් දැන් වඩාත් සැලකිල්ලක් දක්වන්නේ ත්‍රස්තවාදයට වඩා රැකියා සහ ආර්ථිකය සම්බන්ධයෙන් යැයි එම සමීක්ෂණ වාර්තා සඳහන් කළේය.

කෙසේ නමුත් ඉකුත් දා සිදු වූ වෙඩි තැබීම නිසා ඡන්ද දායකයන්ගේ මත වෙනස් වීමේ හැකියාවක් තිබෙන බව විශ්ලේෂකයෝ පෙන්වාදුන්හ. මැතිවරණ කටයුතුවල ආරක්ෂාව සඳහා පොලිස් නිලධාරීන් 50,000ක් ද සොල්දාදුවන් 7,000කට ආසන්න සංඛ්‍යාවක් යෙදවීමට ප්‍රංශ බලධාරීන් කටයුතු කර තිබිණි. වසර 2015 මේ දක්වා කාලයේදී ප්‍රංශයට එල්ල වූ ත්‍රස්ත ප්‍රහාරවලින් 230කට වැඩි පිරිසක් ජීවිතක්ෂයට පත්වූහ. මේ අතර ඉකුත් දා සිදු වූ වෙඩි තැබීම ජනාධිපතිවරණයට විශාල බලපෑමක් එල්ල කරනු ඇතැයි ට්විටර්  පණිවිඩයක් යොමු කරමින් ඇමෙරිකා ජනාධිපති ඩොනල්ඩ් ට්‍රම්ප් ප්‍රකාශ කර තිබිණි.

ප්‍රංශයට අයත් මාටිනික්‍යු සහ කැරිබියන් දූපත්වල පිහිටි ගුවඩලූප් හි සෙනසුරාදා දිනයේදී ජනාධිපතිවරණය වෙනුවෙන් ඡන්ද විමසීම් පැවැත්වුණු අතර ඇමෙරිකාවේ සිටින ප්‍රංශ වැසියෝ ද සෙනසුරාදා දිනයේදී ඡන්දය ප්‍රකාශ කළහ.

මෙවර ජනාධිපතිවරණයට අපෙක්ෂයෝ 11 දෙනෙක් ඉදිරිපත් වී සිටිති.
 
ඒ.එෆ්.පී ඇසුරිනි -055