වසර 10500 කට පෙර සිටි දඩයක්කරුවෙකුට අයත් යැයි සැළකෙන පාසටහන් දෙකක් සොයාගැනීමට ඇමරිකාවේ ඩර්හැම් විශ්වවිද්‍යාලයේ පුරාවිදයාඥයන් පිරිසක් සමත්ව ඇත.

මෙම පාසටහන් යුගළය උතුරු ඇමරිකාවෙන් මෙතෙක් හමුවී ඇති ආදිතම පාසටහන් යුගළය බව සදහන්ය.

1961 වසරේදී මෙක්සිකෝවේ අධිවේගී මාර්ගයක් ඉදිකරමින් සිටියදී හමුව ඇති මෙම පාසටහන් යුගළය එය සටහන්ව තිබූ පස් කොටස් සමගම ඉවත් කර මේ දක්වා තැන්පත් කර තිබී ඇත්තේ ප‍්‍රදේශයේ වූ කෞතුකාගාරයකය.

එය තමන් භාරයට ගෙන ඇති ඩර්හැම් විශ්වවිද්‍යාලයේ පුරාවිද්‍යාඥයන් පර්යේෂණ කටයුතු වලින් පසුව එය වසර 10500 කට පමණ පෙර කාලයකදී පස මත සටහන් වූවක් බව සොයාගෙන ඇත.

එම සමයේ ප‍්‍රදේශයේ ජීවත්වී ඇත්තේ රතු ඉන්දියානු සම්භවයක් ඇති දඩයක්කරුවන් බවට පුරාවිද්‍යාත්මක සාක්ෂි ලැබී ඇති අතර මෙම පාසටහනත් එවන් දඩයක්කරුවෙකුට අයත් වන්නට ඇතැයි පර්යේෂණ කටයුතු මෙහෙයවූ විද්‍යාඥ පිරිස සැක කරයි.

මෙතෙක් ලොව හමුවී ඇති පැරණිම පාසටහන් යුගළය ලෙස සැළකෙන්නේ චිලීයෙන් හමුවූවකි . එය වසර 13000 ක් පමණ පැරණි බව පර්යේෂණ වලින් සොයාගෙන ඇත.