ත්‍රස්තවාදය මැඩලීමේ සටනට ෆේස්බුක් හා ට්විටර් වැනි වෙබ් අඩවිවලින් මීට වඩා සහයක් තමන් බලාපොරොත්තු වන බව අන්තර්ජාතික ආරක්ෂක විශේෂඥයෝ කියති.

ත්‍රස්ත කටයුතු වල නියැළෙන පුද්ගලයින් රැසකගේ ගිණුම් මෙම වෙබ් අඩවිවල තිබීමත් එම පුද්ගලයින්ගේ තොරතුරු ලෝක සාමය තහවුරු කරනු වස් අදාළ බළධාරීන් වෙත ලබාදීමට වෙබ් අඩවි පරිපාලකයින්ට හැකියාව තිබීමත් මීට හේතුවයි.

ලියාපදිංචි වන පරිශීලකයින්ගේ පෞද්ගලික තොරතුරුවල රහස්‍යභාවය රකින්නේ යැයි ඔවුන් හා ගිවිසුමක් ඇතිකර ගන්නා හෙයින් මෙම වෙබ් අඩවි වල පරිපාලකයින් සිටිනුයේ එසේ ලියාපදිංචි වන පුද්ගලයා ත්‍රස්තවාදියෙකු  වුවද ඔහුගේ හෝ ඇයගේ තොරතුරු ප්‍රසිද්ධ කිරිමේ හැකියාවක් තමන්ට නැතැයි යන මතයේය.

ආරක්ෂක කටයුතු වෙනුවෙන් යැයි කියමින් කිසියම් පුද්ගලයෙකුගේ තොරතුරු ලබාදෙන ලෙස නැවත නැවතත් බලපෑම් කරන්නේනම් ආරක්ෂක අංශ පසුපසින් හඹා එමින් සිටින බවත් වහාම ආරක්ෂාව සළසා ගන්නා ලෙසත් සඳහන් කර තමන්ම මැදිහත්ව එම පුද්ගලයා දැනුම්වත් කරන බවට ට්විටර් වෙබ් අඩවිය ආරක්ෂක බලධාරීන් වෙත අනතුරු ඇගවීමක් ද නිකුත් කර තිබේ.

මෙසේ තොරතුරු ඉල්ලා සිටින්නේ ලෝක ආරක්ෂාව වෙනුවෙන් හෙයින් ඉල්ලා සිටින තොරතුරු ලබාදීමේ ගැටලූවක් මෙම වෙබ් අඩවිවලට කිසිසේත්ම තිබිය යුතු නැතැයි ආරක්ෂක බළධරයින්ගේ අදහසයි.

බ්‍රිතාන්‍ය අගමැති ඩේවිඩ් කැමරන්ද  පසුගියදා නිවේදනයක් නිකුත් කරමින් සඳහන් කළේ සමාජ ජාල වෙබ් අඩවි සිටින්නේ නීතියට ඉහළින් නොවේ යැයි එම වෙබ් අඩවි වල පරිපාලකයින් සිහියේ තබා ගත යුතු බවයි.

වර්තමානයේ බොහෝ ත්‍රස්තවාදි සංවිධානයන් තම සන්නිවේදන කටයුතු හා ඇතැම් අවස්ථාවන්වලදී නව සාමාජිකයින් බඳවා ගැනීමට පවා යොදාගන්නේ මෙම වෙබ් අඩවිය පසුගිය දිනෙක බ්‍රිතාන්‍යයේ මුළු පවුලක්ම අයි එස් සංවිධානය හා එක්වීමට සිරියාව බලා පිටත්ව ගිය බව වාර්තා වූ අතර මාධ්‍ය සඳහන් කර තිබුණේ එම පවුලේ සාමාජිකයෝ සමාජ ජාල වෙබ් අඩවි ඔස්සේ අයි එස් සාමාජිකයින් හා සම්බන්ධතා පවත්වාගෙන ඇතැයි හෙළිව තිබෙන බවයි.

කරුණු මෙසේ හෙයින් ඉදිරියේදී සියලූ සමාජ ජාල වෙබ් අඩවි වලට බල පැවැත්වෙන පොදු නීතියක් සම්මත කර ගැනෙනු ඇතැයි සිතිය හැකිය.