මියන්මාරයේ රඛීන් ප්‍රාන්තයේ ප්‍රාථමික පාසලකට අද (13) එල්ල වූ මෝටාර් ප්‍රහාරයකින් දරුවන් 20 දෙනකු තුවාල ලබා ඇතැයි වාර්තා වේ.

මෙම ප්‍රදේශයට කිසිවකුටවත් ඇතුළුවීමටත් පිට වීමටවත් නොහැකි තත්ත්වයක් නිර්මාණය වී තිබෙන අතර මෙම ප්‍රදේශවල ‘ඇරකන් ආමි’ කැරැලිකරුවන් හා රජයේ හමුදා අතර දරුණු ගැටුම් පවතී.

බුතිඩොන්ග් නගර ආශ්‍රිත ප්‍රදේශයේ පාසලකට එම මෝටර් ප්‍රහාරය එල්ල වී තිබෙන අතර එය කවුරුන් කළ ප්‍රහාරයක් ද යන්න මෙතෙක් අනාවරණය වී නොමැත.

පසුගිය වසරේ ජනවාරි මාසයේ සිට දෙපාර්ශවය අතර පවතින ගැටුම් හේතුවෙන් සැලකිය යුතු පිරිසකට ජීවිත අහිමි වී තිබෙන අතර සිය ගණනක් තුවාල ලබා ඇත. තවත් 100,000කට වැඩි පිරිසක් අවතැන් වී සිටිති.

‘ඇරකන් ආමි’ කැරැලිකරුවෝ රඛීන් පළාතට ස්වයංපාලන බලතල ඉල්ලමින් සටන් වදිති.  

මෝටාර් ප්‍රහාරයෙන් එක් දැරියකගේ තත්ත්වය බරපතළ යැයි ද දරුවන් බොහෝ දෙනකුගේ අත් සහා පාවලට තුවාල සිදුව ඇතැයි ද වාර්තා විය. තුවාල ලැබූ දරුවන් සියලු දෙනා ‘කමි’ ජනවර්ගයට අයත් බව පැවසේ.

රඛීන් ප්‍රාන්තයේ වාර්ගික රඛීන් බෞද්ධයෝ එම ප්‍රාන්තයේ සුළුතර ජනතාව ලෙස ජීවත් වෙති.

මෙම ප්‍රාන්තයේ විවිධ ජන හා වාර්ගික කොටස්වලට අයත් පිරිස් ජීවත් වෙති.

2017 වසරේ ඇති වූ ගැටුම් හේතුවෙන් රොහින්ග්‍යා මුස්ලිම් වැසියන් පලාගියේ ද උතුරු රඛීන් ප්‍රාන්තයෙනි. එම ගැටුම් හේතුවෙන් රොහින්ග්‍යා මුස්ලිම්වරු 740,000ක වැඩි පිරිසක් බංග්ලාදේශයට පලා ගියහ.

ඒ.එෆ්.පී.  

055