මාරාන්තික නිෆා වෛරසය ආසාදනය වීමෙන් ඉන්දියාවේ කේරළ ප්‍රාන්තයේ නව දෙනකු මියගොස් ඇතැයි සෞඛ්‍ය බලධාරීහු පවසති.

මෙම රෝගය වැළදුනු තවත් 25දෙනකු රෝහල් ගතකැර ඇතැයි ද පැවසේ.

නිෆා රෝගය සතුන් මගින් මිනිසාට බෝවන රෝගයක් වන අතර රෝගය වැළඳුනු අයගෙන් සියයට 70කට පමණ එය මාරාන්තික වන බව වෛද්‍ය වාර්තා තහවුරු කර ඇත. 

මෙය ප්‍රධාන වශයෙන්ම බෝවන්නේ පළතුරු වවුලා මගිනි. නිෆා රෝගය සඳහා මෙතෙක් එන්නතක් සොයාගෙන නොමැත.

ඉදිරියේදී විශාල වශයෙන් ලොව පුරා පැතිරී යතැයි අනුමාන කරන ප්‍රධාන රෝග 10 අතරට නිෆා ද ඇතුලත්ව ඇති බව ලෝක සෞඛ්‍ය සංවිධානයේ වාර්තාවල දැක්වේ.

රෝගීන්ගේ රුධිර සාම්පල් පූනේහි පිහිටි ජාතික වෛරස අධ්‍යයන විද්‍යා මධ්‍යස්ථානයට යවා ඇති බවත් පෙර සූදානම් කටයුතු සහ නිවාරණ කටයුතු සිදුකරගෙන යන බවත් කේරලයේ සෞඛ්‍ය අංශ පවසයි.

(බීබීසී ඇසුරිණි - 085)