ඇමෙරිකා නාසා අභ්‍යවකාශ ආයතනය ‘කෙප්ලර්’ දුරේක්ෂය අභ්‍යවකාශයේ රඳවා ඇත්තේ, පෘථිවියට සමාන ග‍්‍රහලෝක අප සෞරග‍්‍රහ මණ්ඩලයට ඔබ්බෙන් ඇතිදැයි සෙවීමේ ප‍්‍රධාන අරමුණින්ය. ඒ අනුව විශ්වයේ රහස් අනාවරණය කර ගැනීමට විද්‍යාඥයන්ට හැකිවී තිබේ. මේ සටහන ‘කෙප්ලර්’ විසින් සොයා ගනු ලැබූ ‘අඳුරු වාමනයා’ ගැනය.   

‘අඳුරු වාමනයා’ යනුවෙන් විද්‍යාඥයන් නම් කර ඇත්තේ 2007 වසරේ දී කෙප්ලර් දුරේක්ෂය සොයා ගත් ‘2007 ඕආර් 10’ නමැති වාමන එසේත් නැතිනම් කුරු ග‍්‍රහලොවය. අප සෞරග‍්‍රහ මණ්ඩලයේ ඇති කුරු ග‍්‍රහයන් අතරින් විශාලතම ග‍්‍රහයා ‘2007 ඕආර් 10’ යැයි මේ වනවිට හඳුනාගෙන තිබේ. එපමණක් නොව, එය අබිරහස් පිරුණු තැනක් යැයි ද පැවැසෙයි. එම අබිරහස් එකිනෙක විසඳා ගන්න නාසා විද්‍යාඥයන් මේ වනවිට සමත් වී සිටිනවා යැයි ද පැවැසෙයි.   

ඒ අනුව, කලින් සිතූ ප‍්‍රමාණයට වඩා ‘2007 ඕආර් 10’ විශාල යැයි ලැබුණු දත්තවලින් අනාවරණය වී තිබේ. ‘2007 ඕආර් 10’ ග‍්‍රහයා සොයා ගත්තේ මෙග් ෂ්වබ් සහ මයිකල් බ‍්‍රවුන් නමැති උපාධිධාරීන් දෙදෙනාය. පෙණුනු විදියට මේ කුරු ග‍්‍රහයා විශාල මෙන්ම සුදු පැහැයෙන් යුක්තය. ඒ අනුව, එය ‘හිම කුමරිය’ (ස්නෝව් වයිට්) යනුවෙන් නම්කර තිබේ. කුරු ග‍්‍රහයාගේ නිල නාමය ‘2007 ඕආර් 10’ ය.   

කෙසේ නමුත් පසුගිය දා විද්‍යාඥයන් රැස් කරගත් නවතම දත්තවලට අනුව, මේ කුරු ග‍්‍රහයා අඳුරුය. අනෙක් කුරු ග‍්‍රහයන්ට වඩා ඉතා සෙමින් මෙය හිරු වටා ගමන් කරයි. එක් දිනක් ගත වීමට පැය 45 ක් ගතවෙයි. විශ්කම්භය කිලෝ මීටර් 1,535 කි. මෙම අඳුරු වාමනයා දෙවැනි වන්නේ, එවැනිම තවත් වාමනයෙකු වන ‘මේක්මේක්’ ට පමණි. ‘2007 ඕආර් 10’, ‘මේක්මේක්’, ‘හෝමියා’ සහ ‘ඒරීස්’ යනු ප්ලූටෝ මෙන්ම අප සෞරග‍්‍රහ මණ්ඩලයේ ඇති කුරු ග‍්‍රහයන්ය.   

ජාත්‍යන්තර තාරකා විද්‍යා සංගමයට අනුව, ග‍්‍රහලෝකයක් වීමට නම් සුදුසුකම් තුනක් සපුරා තිබිය යුතුවේ. ඒ අතරින් පළමු සුදුසුකම වන්නේ එය හිරු වටා භ‍්‍රමණය වීමය. එය තවත් ග‍්‍රහලොවක චන්ද්‍රයකු නොවිය යුතුය. දෙවැන්න තමන්ටම කි‍යා ගුරුත්වාකර්ෂණ බලයක් ඊට තිබිය යුතු අතර, එය ගෝලාකාර හැඩයක් ගත යුතුය. අවසන් සුදුසුකම වන්නේ සෞරග‍්‍රහ මණ්ඩලයක සෙසු ග‍්‍රහලෝක ගමන් කරන ආකාරයට හිරු වටා භ‍්‍රමණය විය යුතුය. කුරු ග‍්‍රහයන්ට එසේත් නැතිනම් වාමන ග‍්‍රහයන්ට මෙම සුදුසුකම් නැත. අප සෞර ග‍්‍රහ මණ්ඩලය අයත් වන ක්ෂීරපථයේ හෙවත් කිරිසයුර තුළ වාසයට සුදුසු ග‍්‍රහලෝක බිලියන ගණනක් ඇතැයි පසුගිය වසර හයක් තිස්සේ විද්‍යාඥයන් විසින් කළ අධ්‍යනයකින් හෙළිවී ඇත. තාරකා විද්‍යාඥයන් වසර හයක් තිස්සේ තරු පිළිබඳව කළ සියුම් අධ්‍යයනයකින් පසු මිනිසාට ජීවත් විය හැකි ග‍්‍රහලෝක බහුලව ඇති බව සොයාගෙන තිබේ.   

ලුසිත ජයමාන්න