ග්‍රහ අපල යනුවෙන් හඳුන්වන්නේ ඔබ අප පෙර කරන ලද අකුසල්ය. අකුසලය ප්‍රබල නම් විපාකද රුදුරු වේ. එවැනි අපල දින හතක් බෝධි පූජා තබා හෝ දෙවියෙකුට භාරයක් වූ පමණින් දුරු නොවේ. එම අපලවලින් මිදීමට නම් පූර්ව අකුසලයට අභියෝග කළ හැකි බලවත් කුසල් සිදු කළ යුතුවේ. දෙවි දේවතාවුන්, පිදීම භාරහාර වීම මහා කුසල් සම්පාදනය කරන ක්‍රියා නොවේ. 

එමෙන්ම දෙවියන්ගේ ආශිර්වාදය ලැබෙන්නේ පිං කරන යහපත් මිනිසුන්ටය. දිනපතා පව් කරමින් පවෙහි ගැලී දෙවියන් වැන්දාට අපල දුරු නොවේ. දැනට ඔබට අපලයක් පවතීනම් හෝ ඉදිරියේදී අපල කාලයක් ලබයි නම් ඔබ කළ යුත්තේ වහ වහා කුසල් රැස් කිරීමය. ධර්මයේ හැසිරීමය. අපලය ප්‍රබලනම් එයට අභියෝග කළ හැකි ප්‍රබල කුසල් රැස් කළ යුතුය. එවැනි ප්‍රබල කුසල් තිබෙන්නේ ඉතා සීමිත සංඛ්‍යාවකි. ඒ අතරින් ඕනෑම අපලයක් දුරු කළ හැකි එක් මහා කුසලයක් හඳහන තුළින් අද ඔබට ඉදිරිපත් කරනු ලැබේ. 
මේ සඳහා විශාල මුදලක් වැය නොවේ. එමෙන්ම නිවසේ සිටම ඔබට මේ මහා කුසලය සිදුකර ගත හැකිය. ඕනෑම අකුසල කර්මයක් දුරු කළ හැකි මේ මහා කුසලය නම් ගෙදර බුදුන් වන හැදූ වැඩූ මාපියන්ට සැලකීමයි. වයෝවෘද්ධ මව් - පිය දෙපළට නිසි ලෙස සලකයි නම්, ආදරය කරුණාව දක්වයි නම්, ඔබ කිසිම ග්‍රහයකුගේ කිසිම අපලයකට බිය විය යුතු නැත. සැබෑ ආදරය මව් පිය දෙපළට දක්වන්නාවූ දරුවන්ට දෙවියන්ට බාරවන්නට හෝ දෙවියන්ගෙන් යමක් ඉල්ලන්නට අවශ්‍ය නැත. එවන් පුද්ගලයන් කෙරෙහි දෙවියන් ස්වකැමැත්තෙන්ම උපකාර කරනු ලැබේ. මරණය වුවද මේ මහා කුසලය තුළින් ප්‍රමාද කළ හැකි වෙයි. මා මෙය ප්‍රායෝගිකව අත්දැක ඇති සත්‍යයකි. 
මීට වසර දෙකකට පමණ පෙර වයස 30 - 35 අතරේ පසුවූ යුවළක් මගෙන් හඳහන් බලන්නට පැමිණියේය. ජ්‍යොතිෂයට අනුව බොහෝ දුෂ්කර කාලයක් ඔවුන්ට ලබාදී ඇති බව දක්නට ලැබුණි. එය

පෙර කරන ලද අකුසල් තදින්ම ඔවුන්ට විපාක දෙන කාලයක් විය. කරන කියන කටයුතු සියල්ල අසාර්ථක වී තිබුණි. ඒ වනවිට ඔවුහු මානසික වශයෙන්ද දුර්වල වී සිටියහ. 
නොයෙක් පුද්ගලයන්ගෙන් හඳහන් බලා ශාන්තිකර්ම වෙනුවෙන්ද විශාල මුදලක් ඔවුන් වැය කර තිබුණි. නමුත් කිසිදු යහපත් ප්‍රතිඵලයක් එතෙක් ඔවුන්ට ලැබී තිබුණේ නැත. එම පුරුෂ කේන්ද්‍රයෙහි සඳු ඉතා දුබල තත්ත්වයක පැවති අතර එම සඳු හරහා සෙනසුරු ගමන් කරමින් තිබුණි. එය ජ්‍යොතිෂයට අනුව ඒරාෂ්ටක කාලයකි. 

බොහෝ දුරට රවි සහ සඳු දුර්වල වන්නේ පෙර ආත්මවල මාපියන්ට නොසැලකීම නිසාය. මා ඔවුන් සමඟ කතාබහ කරන විට වසර හතරකින් එම පුද්ගලයා දෙමාපියන් බලන්නට ගොස් නැත. පැවති සියලු අපල වෙනුවෙන් මා ඔවුන්ට ලබාදුන්නේ ශාන්තිකර්ම දෙකක් පමණි. ඉන් ප්‍රධානම එක වූයේ වහාම මව් - පිය දෙපළ බලන්නට යාමයි. දින තුනක් මව්පිය දෙපළ සමඟ ගතකොට එන ලෙස මම ඔවුන්ට නියම කළෙමි. 

මෙම සිදුවීමෙන් මාස හතකට පසු ඔවුහු නැවත මා හමුවීමට පැමිණියහ. ඔවුන්ගේ ප්‍රශ්නවලින් බොහෝමයක් එ්වන විට විසඳී තිබුණි. 

ඔහු මෙවැනි කතාවක් මා සමඟ කීවේය. ‘‘දවස් තුනක් අම්මලත් එක්ක ඉඳල පාන්දර අපි බස් එකේ කොළඹ එන්න පිටත්වුණා. කොච්චර ප්‍රශ්න තිබුණත් මගෙ හිතට ලොකු නිදහසක්, සැනසීමක් දැනුණා. ඊළඟට මම මොකක් කළ යුතුදැයි කල්පනා කර කර එනකොට හිටි හැටියෙ මට අළුත් අදහසක් පහළ වුණා. මම ගෙදර ආපු ගමන්ම ඒක ක්‍රියාත්මක කරන්න පටන් ගත්තා. ඒක ඉතා සාර්ථක වුණා. මේ වෙනකොට ප්‍රශ්නවලින් ගොඩක් විසඳිලා තියෙන්නෙ. මම හිතන්නෙ මට ඒ අලුත් අදහස පහළවුණේ අම්මගෙයි, තත්තගෙයි ආශිර්වාදය නිසා කියලයි.’’ 

ඔබේ මව පියා කොතරම් උසස් වුවත් පහත් වුවත්, උගත් වුවත් නූගත් වුවත්, හරි වුවත් වැරැදි වුවත් ඒ ඔබේ මව්පිය දෙපළ බව තේරුම් ගත යුතුයි. ඔවුන්ට සැලකීමේ ආදරය දැක්වීමේ, රැක බලා ගැනීමේ කුසලය වෙනත් කිසිදු ශාන්තිකර්මයකට සම කළ නොහැකිය. මේ මහා කුසලය නිසා හිරු දුටු පිනි මෙන් අපල දුරුවී යයි. මෙහිදී මව්පිය දෙපළට සැලකීම යනු කන්න අඳින්න දීම හෝ මුදල් ටිකක් දීම පමණක් නොවේ. ලෙඩ දුක්වලදී පිහිට වීම, ඔවුන් සමග ජීවත්වීම, ඔවුන්ට ආදරය දැක්වීම කළ යුතුයි. 

එවිට මව්පියන්ගේ සිතෙහි නැගෙන දාරක සෙනෙහසින් යුතු ආශිර්වාදය වෙනත් කිසිදු දෙවියෙකුට ලබාදිය නොහැකිය. මා දැක ඇති පරිදි මව්පිය දෙපළට නොසලකන දරුවන්ට ලබන ග්‍රහ අපල කටුක බවින් වැඩිය. ඔබ ඔබේ මව් - පිය දෙපළට නොසලකා කතරගම නොව තිරුපති ගියත් දෙවියන් ඔබට පිහිට වන්නේ නැත. පුද පූජා තබා භාරහාර වන විට, පිහිට පතන විට, දෙවියන් බලන්නේ ඔබේ ක්‍රියාකලාපය දෙසයි. 

මව්පිය දෙපළට නොසලකන ගෞරව නොකරන දරුවන් දේව ධර්මයට අනුව දුර්ජනයන්ය. පූජා වට්ටියකින් හෝ දාහේ කොළයකින් දෙවියන් රැවටිය නොහැක. විශේෂයෙන්ම සෙනසුරු, රවි, සඳු ගෙන් ඇති වන අපල සඳහා මව්පිය දෙපළට සැලකීම තරම් වෙනත් ප්‍රබල ශාන්තිකර්මයක් නැත. 

මෙහිදී මව්පියන් ලෙස දක්වන්නේ මව්පියන් පමණක් නොවේ. ඔබේ බිරිඳ​ගේ හෝ සැමියාගේ මව්පියන්ද ඇතුළත්වය. එහෙයින් මෙම මව් පියන් සතර දෙනාට නිසි ලෙස සලකනු ලබයි නම් කිසිදු ග්‍රහ අපලයකට ඔබ බිය විය යුතු නැත. සෙනසුරු දශා, සෙනසුරු ඒරාෂ්ටක හා රවි, සඳු ගෙන් වන ඕනෑම අපලයක් සඳහා දිනපතා හෝ හැකි උපරිමයෙන් මව්පියන්ට සලකමින් දිනපතා බුදුන් වැඳ අභිසම්භිධාන පිරිත 7 වරක් කියා දෙවියන්ට පිං අනුමෝදම් කිරීමෙන් කොතරම් ප්‍රබල අපලයක් වුවද මර්දනය කර දියුණුව සැපත සතුට උදාකරගත හැකිවේ. 

එහෙයින් නොපමාව ගෙදර සිටින දෙවියන්ට සලකන්න. ඔවුන්ගේ ආශිර්වාදය ලබාගන්න. මාස කිහිපයක් මෙම ශාන්තිකර්මය කර බලන්න. අපල දුරුවී යන හැටි ප්‍රායෝගිකවම ඔබට දැකගත හැකි වේ. 

වාස්තුවිද්‍යා උපදේශක, ජ්‍යොතිෂාචාර්ය 
අනුරාධ පෙරේරා - හොරණ.