රෝහල්වල සිදුවන වංචා දුෂණ සහ අකටයුතුකම් සම්බන්ධයෙන්  විධිමත් පරීක්ෂණයක් සිදු කරන්නැයි  සෞඛ්‍ය, පෝෂණ හා දේශීය වෛද්‍ය  අමාත්‍ය රාජිත සේනාරත්න මහතා  සෞඛ්‍ය අමාත්‍යංශයේ  විමර්ශන ඒකකයට  උපදෙස් ලබා දී  තිබේ.

වෛද්‍යවරුන්  සිදු කරන විවිධ අකටයුතුකම්, රාජකාරී වේලාවේ පෞද්ගලික වෛද්‍ය සේවා සිදු කිරිම, නොමිලේ ලබාදෙන අක්ෂි කාච, ස්ටෙන්ස් වැඩපිලිවෙළ නිසි පරිදි ක්‍රියාත්මක වීම, පිළිබදව  විධිමත්ව පරීක්ෂණ පවත්වන්නැයි එහිදී උපදෙස් ලබා දී තිබේ.

මේ යටතේ  ලංකාවේ සියලුම මධ්‍යම රජයේ සහ පළාත් සභා රෝහල් සියල්ලම විමර්ශනයට ලක් කරන ලෙස ද උපදෙස්  ලබා දී තිබේ.

එමෙන්ම එම විමර්ශන කටයුතු සිදුකරන නිලධාරීට අවශ්‍ය සියලුම පහසුකම් ලබා දීම සඳහ අමාත්‍යවරයා එකඟතාව පළ කර ඇති අතර සෞඛ්‍ය අමාත්‍යාංශයේ විමර්ශන ඒකකයේ නව අධ්‍යක්ෂවරයා ලෙස සුදත් රත්නවීර මහතා පත් කිරීමටද නියමිතය.

ඇතැම් රෝහල්වල වෛද්‍යවරුන්ට එරෙහිව ඉදිරිපත්ව ඇති නිර්නාමික හා නාමික චෝදනා පෙත්සම් විමර්ශනය කිරීමට යාමේ දී වෛද්‍ය සංගම්වලින් එල්ලවන බලපෑම් පිළිබදව ද, එවැනි බලපෑම් අනුරාධපුර මහ රෝහල සහ කරාපිටිය ශික්ෂණ රෝහලේ දී එල්ල වූ බව විමර්ශන නිලධාරීන්  දැනුම් දී ඇති අතර  රෝහල්වල සිදුවන විවිධ වැරදි සොයා බලා පරීක්ෂණ පැවැත්වීම වෛද්‍යවරුන්ගේ පමණක් නොව සියලුම සෞඛ්‍ය සේවකයින්ගේ ද සිදු කරන බව විමර්ශන නිලධාරින්  අමාත්‍යවරයා වෙත දැනුම් දී තිබේ.

(36698)