සුමතිපාල දීයගහගේ 
 
අහංගම කතලුව ප්‍රදේශයේ පිහිටි සංචාරක හෝටලයකට විදුලිය ලබා ගැනීම සඳහා පොළව යටින් ඇද තිබු රුපියල් ලක්ෂ දෙකක් වටිනා භූගත තඹ විදුලි රැහැන් මීටර් දෙසියක් කපා සොරකම් කර ගෙන යෑම සම්බන්ධයෙන් එම හෝටලයේම සේවකයින් දෙදෙනෙකු අත්අඩංගුවට ගත් බව අහංගම පොලිසිය පවසයි.

හෝටලයේ  සිට විදුලි ට්‍රාන්ස්ෆෝමරයක් දක්වා පොළව යටින් මෙම විදුලි රැහැන් ඇද කලකට පෙර හෝටලයට විදුලිය ලබා ගෙන ඇත. එහෙත් පසුව නව විදුලි රැහැන් මාර්ගයකින් හෝටලයට විදුලිය ලබා ගැනීමෙන් පසුව මෙම භූගත විදුලි  රැහැන් මාර්ගය අතහැර දමා තිබු නිසා එම විදුලි රැහැන් වැඩකට නැතැයි සිතා විදුලි රැහැන් කපා ගත් බව සැකකරුවන් දෙදෙනාගෙන් ප්‍රශ්න කිරිමේදී පොලිසියට පවසා ඇත.

සොරකම් කරන ලද විදුලි රැහැන් තොගය පරණ යකඩ වෙළඳසැලකට විකුණා මොවුන් දෙදෙනා මුදල් ලබාගෙන ඇති බවද පොලිස් පරික්ෂණවලදී අනාවරණය වී ඇත.

සැකකරුවන් අද (27) අධිකරණය වෙත ඉදිරිපත් කිරිමට නියමිතය.