(රංජිත් රාජපක්ෂ)                       

කාසල්රි ජලාශයට ප්‍රධාන වශයෙන් ජලය ගලා බසිනා කෙසෙල්ගමුඔය පිටාර ගැලීමෙන් නොර්වුඩ් ප්‍රදේශයේ පහත්බිම්වල පවුල් 30 ක් පමණ අවතැන් වී ඇතැයි නොර්වුඩ් පොලිසිය පවසයි.
 
ඊයේ (30) දින රාත්‍රි 11 ට පමණ නිවාසවලට අඩි තුනක් පමණ කෙසෙල්ගමුඔයේ ජලය කාන්දු වු බවත්, පැය තුනකට පමණ  පසු එම ජලය බැස ගිය බව එම නිවාසවල පදිංචිකරුවෝ කියති.
 
මේ හේතුවෙන් පවුල් 30 කට අයත් සාමාජිකයන් 125 දෙනෙක් පමණ අවතැන්ව සිටිති.
 
කෙසෙල්ගමුඔය පිටාර ගැලීමත් සමග නොර්වුඩ් පොලිසියේ නිලධාරීහු ගම්වැසියන් පදිංචි නිවාසවලින් ඉවත් කිරීමට පියවර ගත්හ.
 
ගං වතුර තත්වය නිසා නොර්වුඩ් ග්‍රාමසේවා කාර්යාල, සමෘද්ධි කාර්යාලය ගං වතුරෙන් යට වී තිබිණි.
 
කෙසෙල්ගමුඔය ආරම්භ වන බගවන්තලාව මහඑළිය රක්ෂිතයේ ජල පෝෂක ප්‍රදේශයට ඊයේ (30) දින පස්වරුවේ සිට ඇද හැලෙන අධික වර්ෂාවත් සමඟ කෙසෙල්ගමුය පිටාර ගලා ඇති බව නොර්වුඩ් පොලිසිය කියාසිටියි.
 
කෙසෙල්ගමුඔය පිටාර ගැලීම වලකාලිමට පසුගිය දා අපදා කලමණාකරණ ඒකකය මගින් විශාල මුදලක් වැය කර කෙසෙල්ගමුඔය පුළුල් කළද ඉන්පලක් වී නොමැති බව ගම්වැසියෝ කියති.
 
මේ වනවිට කාසල්රි ජලාශයේ ජල මට්ටමද  ඉහළ යමින් පවතී.
 
අපදා තත්වයෙන් අවතැන් වුවන්ට අවශ්‍යය පහසුකම් සැලසිමට ගිනිගත්හේන ප්‍රාදේශීය ලේකම් කාර්යාලය සහ නුවරඑළිය ආපදා කලමණාකරන ඒකකය කටයුතු කර ඇත.