(ගල්කිරියාගම කුෂාන් ජයවර්ධන)

කැකිරාව හෝරාපොල ප්‍රදේශයේ වගා බිමක ඇති අඩි 25ක් පමණ ගැඹුරැති අනාරක්ෂිත වගා ළිඳකට අලි දෙදෙනෙකු ඊයේ (02) රාත්‍රී කාලයේදී ආහාර සොයායන අතරේදී වැටී තිබේ.

මෙම අලි දෙදෙනා අතර වයස අවුරුදු 04ක් පමණ වන අලි පැටවකු හා අවුරුදු 25ක් පමණ වන අලියෙකු වන බව වනජීවී නිලධාරීහු පවසති.  

මේ දිනවල ප්‍රදේශයට බලපා ඇති දැඩි වියළි කාලගුණයත් සමග මතුව ඇති ආහාර හා ජලය හිඟය හේතුවෙන් කලාවැව ජාතික උද්‍යානයේ සිටින වල් අලින් නිරන්තරයෙන් ගම් වැදීම සිදුවේ. මෙම අලි දෙදෙනාද එසේ පැමිණෙන්නට ඇතැයි වනජීවී නිලධාරීහු පවසති.

ළිඳේ වැටී සිටින අලි දෙදෙනා ගොඩ ගැනීම සඳහා ගල්කිරියාගම වනජීවී කාර්යාලයේ නිලධාරීන් මේ වනවිට මෙහෙයුම් අරඹා තිබේ. කලාවැව ජාතික උද්‍යානයේ කටයුතුද බාර ගල්කිරියාගම වනජීවී කාර්යාලය සතුව ජේ.සී.බී යන්ත්‍රයක් නොමැතිකමින් මේ වනවිට එම මෙහෙයුම් දියත් කිරීමේ ප්‍රමාදයකටද වනජීවී නිලධාරීන්ට මුහුණ දීමට සිදුවී තිබේ.