චන්ද්‍රසේන ගමගේ

තංගල්ල මහෙස්ත්‍රාත් අධිකරණයෙන් ඉකුත් 06 වැනි දින නිකුත් කළ සෝදිසි වරෙන්තුවක් කඩ කර පොලිස් නිළධාරීන්ට බලපෑම් කළ පියෙකු හා පුතුන් දෙදෙනෙකු අද (14) දින තංගල්ල මහෙස්ත්‍රාත් අධිකරණයට ඉදිරිපත් කිරීමෙන් අනතුරුව විනිසුරු එල්.ටී. වරුසවිතාරණ මහතා විසින් ලබන 22 දින දක්වා බන්ධනාගාර ගත කර තිබේ.

තංගල්ල නාකුළුගමව ප්‍රදේශයේ නිවසක තබාගෙන නීති විරෝධීව මත්පැන් අළෙවි කරනු ලබන බවට තංගල්ල පොලීසියට ලැබී තිබූ තොරතුරකට අනුව එම නිවස පරීක්ෂා කිරීම සදහා අධිකරණ නියෝගය ලබා ගෙන තිබුණේ තංගල්ල මූලස්ථාන පොලීසියේ ස්ථානාධිපති වරයා විසින්ය.

ඉකුත් 06 වැනි දින අධිකරණ නියෝගයද සහිතව අදාළ නිවස සෝදිසි කිරීමට පොලිස් නිළධාරීන් පැමිණි මොහොතේ එම නිවසේ පියා හා දරු දෙදෙනො පොලීසියට බලපෑම් කර නිවසෙන් පැන ගොස් තිබූ අතර නිවස සෝදිසි කීමටද ඔවුන් ඉඩ දී තිබුනේ නැති බව පොලීසිය අධිකරණයට කරුණු වාර්තා කර තිබුණි .

පසුව කිහිප විටක් පියා හා පුතුන් දෙදෙනො අත් අඩංගුවට ගැනීමට තංගල්ල පොලීසියේ පොලිස් නිළධාරීන් උත්සාහ කළද ඔවුන් පොලීසිය මග හැර තිබුණි .අද දින අදාළ නිවසට ගිය පොලිස් නිළධාරීන්ට පියා හා එක් පුතෙකු අත් අඩංගුවට ගැනීමට හැකි වී තිබේ.

අදත් අඩංගුවට ගැනීමට නොහැකි වූ එක් පුතෙකු නීතිඥයෙකු මාර්ගයෙන් අද දින තංගල්ල මහෙස්ත්‍රාත් අධිකරණයට ඉදිරිපත් වී තිබුණි.

අත් අඩංගුවට පත් පියා හා පුත්‍රයා පොලීසිය විසින් අද (14) දින තංගල්ල මහේස්ත්‍රාත් අධිකරණයට ඉදිරිපත් කර තිබුණි.


එහිදී සිද්ධිය විමර්ශනයට ලක්කළ මහෙස්ත්‍රාත් වරයා පියා හා පුතුන් දෙදෙනා බන්ධනාගාර ගත කරන ලෙසට නියෝග කොට තිබුණි.

මෙලෙස අධිකරණ නියෝග කඩ කොට පොලිස් නිළධාරීන්ට බලපෑම් කළ බවට චෝදනා ලැබ බන්ධනාගාර ගත් වූයේ වීරසිංහ ගේ ධර්මසේන හා ඔහුගේ පුතුන් දෙදෙනා වන වීරසිංහ ගේ තරිදු දිල්ෂාන් ,වීරසිංහ ගේ මංජුල සදරුවන් යන අයයි.

නීතිඥයෙකු මාර්ගයෙන් අධිකරණයට භාර වී ඇත්තේ වීරසිංහගේ තරුදු දිල්ෂාන් යන අය යි.

සිද්ධියට සම්බන්ධ නිවස මීට පෙර අවස්ථා ගණනාවකදී පොලිස් සෝදිසි කිරීම් වලට ලක්වූ නිවසක් වෙන අතර එහිදී මහා පරිමානයෙන් කසිප්පු හා විවධ පත්පැන් වර්ග ගබඩා කොට තිබියදී අත් අඩංගුවට ගෙන තිබේ.