(මුදිතා දයානන්ද)

අද ජනාධිපතිත් අගමැතිත් අතර කඹ ඇදිල්ලක් මිස රටේ සංවර්ධනය වෙනුවෙන් කරන කිසිවක් නැහැ. ඒ නිසා රටේ ආර්ථිකය බිංදුවටම වැටිලා යැයි ශ්‍රී ලංකා පොදු ජන පෙරමුණේ සභාපති හිටපු අමාත්‍ය ජී. එල්. පීරිස් මහතා අද (24) පැවසීය.

පීරිස් මහතා මෙසේ පැවසුයේ බත්තරමුල්ල නෙලූම් මාවතේදි පැවති මාධ්‍ය හමුවකදි වන අතර තවදුරටත් ඔහු මෙසේ ද පැවසීය.

අද මිනිස්සුන්ට කන්න නැතිවෙන තරමට බඩු මිල ඉහළ ගිහින්. රුපියල කඩා වැටිලා. ආර්ථිකය කඩා වැටිලා. ඒවාට උත්තර හොයනවා වෙනුවට අද අගමැතිත් ජනාධිපතිත් කඹ අදිනවා. කිසිම දෙයක් සම්බන්ධයෙන් දෙදෙනා අතර කිසිම එකගතාවයක් නැහැ. බලයට ආපු ගමන් ශ්‍රී ලංකා මහ බැංකුවේ කීර්තිනාමය නැත්තටම නැති කළා.

සිංගප්පූරු ශ්‍රී ලංකා නිදහස් වෙළඳ ගිවිසුම ගැන හොයන්න ජනාධිපති කමිටුවක් පත් කර තිබෙනවා. ගිවිසුම අත්ස්න කරලා මාස අටක් ගියාට පස්සේ තමයි මේක හොයන්නේ. මේවා කරන්න පුලූවන් වැඩද? ඒක ලේසි වැඩක් නෙවෙයි. මේවායින් සිදුවන්නේ රට අස්ථාවර විමයි. 

නාමල් කුමාර හෙලි කරනවා ජනාධිති හා හිටපු ආරක්ෂක ලේකම් ඝාතනය කිරිමේ කුමන්ත‍්‍රණයක් තිබුණා කියලා. ඔහු නිකම් නෙවෙයි සාක්ෂි සහිතව කියනවා. ඒ කුමන්ත‍්‍රණයේ හිටපු කෙනෙක් තමයි නාමල් කුමාරත්. වෙන රටක නම් මේ වෙනකොට දෙන්නාවම අත්අඩංගුවට අරන්. අපේ රටේ තවම මෙහි ප‍්‍රධාන පුද්ගලයෙක් වෙන නියෝජ්‍ය පොලිස්පති නාලක සිල්වා වත් අත්අඩංගුවට අරන් නැහැ. මේ පරික්ෂණ සිදුකෙරෙන්න කලින් මුලින්ම ඉවත් වෙන්න  ඕන පොලිස්පතිතුමායි. මහින්ද අමරවීර ඇමතිවරයා පවා කියනවා නාලක සිල්වා අත්අඩංගුවට ගත යුතුයි කියලා. ඒත් එයාලට මොනවත් කරන්න බැහැ. මොකද එක්සත් ජාතික පක්ෂය ඒකට ඉඩ දෙන්නේ නැහැ.