(ආරියරත්න රණබාහු)

හමුදාව නීතියට පුරුදු පුහුණු වූ අයෙකුට ප්‍රජාතන්ත්‍රවාදී නීතියට හුරුවීමට වසර 25 ක හෝ 30 ක කාලයක් ගතවිය හැකි යැයි රාජ්‍ය පරිපාලන හා ස්වදේශ කටයුතු අමාත්‍ය වජිර අබේවර්ධන මහතා අද (21) පැවසීය.

වසර දෙදහස් ගණනක විශිෂ්ඨ බෞද්ධ සංස්කෘතියක් උරුමයට අනුව හැඩ ගැසුණු ජාතියක් වෙසෙන ශ්‍රී ලංකාව පකිස්ථානයක් නොවන බව පැවසූ ඇමැතිවරයා ඒ අනුව ලක්වාසී සියලු ජනතාව මෙවර ජනාධිපතිවරණයේදී සිහි බුද්ධියෙන් යුතුව කටයුතු කරනු ඇතැයි ද හෙතෙම කීය.

ආගම්වාදී ජාතිවාදී නොවන එක්සත් ජාතික පක්ෂයේ මෙරට සිංහල දෙමළ මුස්ලිම් බර්ගර් මැලේ ආදී සියලුම ජාතීන්ට ප්‍රජාතන්ත්‍රවාදී නිදහස භුක්ති විදිමින් නිදහසේ ජිවත්වීමට ඉඩකඩ සලසා දී ඇති බවද ඇමතිවරයා කීය.

ඒ අනුව මෙතෙක් දිනා ඇති එම නිදහස යළි වැළලීමට ඉඩ නොදිය යුතු බව කී ඇමැතිවරයා නැවත මේ රට පරිහානියට ඇද දැමීමට කටයුතු නොකර සිටීමට සියලු රාජ්‍ය සේවකයින් ඇතුළු සෑම දෙනාම කටයුතු කරනු ඇතැයි විශ්වාස කරන බව ඇමැතිවරයා කීය.

ඇමැතිවරයා මෙම අදහස් පළකරනු ලැබුවේ අද (210 පිටකෝට්ටේ සිරිකොත පක්ෂ මූලස්ථානයේ පැවැති මාධ්‍ය හමුවකදීය.