(ඩයනා උදයංගනී සහ නිමල කොඩිතුවක්කු)

උසස්වීම් ක‍්‍රමයේ විෂමතා ඉවත් කරගැනීම ඇතුළු ඉල්ලීම් කිහිපයක් මුල් කරගනිමින් හෙද, පරිපූරක හා අතුරු වෛද්‍ය සේවාවන්ට අයත් වෘත්තීය සමිති 16ක් අද (8) පෙරවරු 7.00 සිට දීපව්‍යාප්තව ක‍්‍රියාත්මක කළ එක් දින වැඩ වර්ජනය හේතුවෙන් රෝහල් රැසක දෛනික කටයුතුවලට බාධා එල්ල වූ බව වාර්තා වේ.

මේ හේතුවෙන් කොළඹ ජාතික රෝහල ඇතුළු රෝහල් ගණනාවක සායන, වෛද්‍ය පරීක්‍ෂණ ඇතුළු කටයුතු රැසක් නිසි ලෙස සිදුනොවූ බව ආරංචි මාර්ග පවසයි.

ඇතැම් රෝහල්වල සායනවලදී වෛද්‍යවරුන් විසින් බෙහෙත් නිර්දේශ කර ඇතත් ඖෂධ සැපයුම් අංශ වසා දමා තිබීම හේතුවෙන් එම රෝගීන්ට ඖෂධ ලබානොගෙන හිස් අතින්ම පිටත්ව යාමට සිදුවූ බවද වාර්තා විය.

කොළඹ ජාතික රෝහල, මහනුවර මහ රෝහල, රත්නපුර මහ රෝහල, අනුරාධපුර ශික්‍ෂණ රෝහල, කළුබෝවිල ශික්‍ෂණ රෝහල, ගම්පහ මූලික රෝහල ආදී රෝහල් රැසක කටයුතුවලට මේ හේතුවෙන් බාධා එල්ල වී තිබිණි.

උපාධිධාරීන්ට වෘත්තීමය වැටුප් තලයක් ලබාගැනීම සහ රනුග්ගේ කොමිසමේ වාර්තාව ක‍්‍රියාවට නැංවීම ඇතුළු ඉල්ලීම් 10ක් මුල්කරගනිමින් හෙද, පරිපූරක හා අතුරු වෛද්‍ය සේවාවන්ට අයත් වෘත්තීය සමිති 16ක් අද (8) පෙරවරු 7.00 සිට දීපව්‍යාප්තව ආරම්භ කළ මෙම එක් දින වැඩ වර්ජනය ඉතා සාර්ථක වූ බව රජයේ හෙද නිලධාරීන්ගේ සංගමයේ සභාපති සමන් රත්නප‍්‍රිය මහතා පැවසීය.

මෙම වැඩවර්ජනය හෙට (9) පෙරවරු 8.00ට අවසන්වීමට නියමිත අතර රජය මේ සම්බන්ධයෙන් නිසි අවධානය යොමු නොකළහොත් අනිද්දා (10) යළිත් රැස්වී ගත යුතු ඉදිරි වෘත්තීය ක‍්‍රියාමාර්ග ගැන තීරණයක් ගන්නා බව ද රත්නප‍්‍රිය මහතා සඳහන් කළේය.