( තිළිණි ද සිල්වා සහ රංජන් කටුගම්පොල)
 
අධිකරණයට අපහාස කළේ යැයි චෝදනා කරමින් උතුරු පළාත් හිටපු මහ ඇමති සී.වී.විග්නේෂ්වරන් මහතාට එරෙහිව ගොනුකර ඇති පැමිණිල්ල ලබන මැයි 23 වැනිදා කැඳවීමට අභියාචනාධිකරණය අද (21) නියම කළේය.

එම පැමිණිල්ල අභියාචනාධිකරණ විනිසුරු මහින්ද සමයවර්ධන මහතා හමුවේ ඊයේ කැඳවනු ලැබූ අතර එහිදී අදාළ පැමිණිල්ල එදිනට කැඳවා එය විභාගයට ගැනීම පිළිබඳ සළකා බලන බව සඳහන් කළේය.

උතුරු පළාත් මහ ඇමැතිවරයා අධිකරණයට අපහාසයක් සිදුකර ඇති බවට චෝදනා කරමින් උතුරු පළාත් හිටපු අමාත්‍යවරයකු වන එස්.ඩෙනීෂ්වරන් මහතා මෙම පැමිණිල්ල ඉදිරිපත් කර තිබිණි.

උතුරු පළාත් සභාවේ ධීවර අමාත්‍යවරයා ලෙස කටයුතු කළ බී.ඩෙනිෂ්වරන් මහතා එම තනතුරෙන් ඉවත් කිරීමට එරෙහිව ඒ මහතා විසින් මීට පෙර අභියාචනාධිකරණය හමුවේ රිට් පෙත්සමක් ගොනුකර තිබිණි.

එම පෙත්සම විභාග කළ අභියාචනාධිකරණය ඒ මහතා නැවත අමාත්‍ය තනතුරේ පිහිටුවන මෙන් උතුරු පළාත් මහ ඇමැතිට එරෙහිව  ඉකුත් වසරේ ජුනි 29 වැනි දා අතුරු නියෝගයක් නිකුත් කළේය.

එම නියෝගය පරිදි තමන්ව අමාත්‍යධූරයෙන් පිහිටවීම ප‍්‍රධාන අමාත්‍යවරයා විසින් ප‍්‍රතික්ෂේප කර ඇති බවත්,   ඒ තුළින් ඔහු අධිකරණයට අපහාසයක් සිදු කර ඇති බවට චෝදනා කරමින් ඩෙනීෂ්වරන් හිටපු අමාත්‍යවරයා විසින් අභියාචනාධිකරණයට පැමිණිල්ලක් ඉදිරිපත් කර තිබිණි.

එම පැමිණිල්ල සළකා බැලූ අභියාචනාධිකරණය උතුරු පළාත් සභාවේ ප‍්‍රධාන අමාත්‍ය විග්නේෂ්වරන් එම පළාත් සභාවේ අමාත්‍යවරුන් වන ආනන්දි සසිදරන් සහ පී.සිවනෙෂන් යන අයට  අධිකරණය හමුවේ පෙනී සිටින දන්වා ඉකුත් අගෝස්තු 08 වැනිදා නොතීසි නිකුත් කෙරිණි.

උතුරු පළාත් ප‍්‍රධාන අමාත්‍යවරයා වෙනුවෙන් පෙනී සිටි ජනාධිපති නීතිඥ ඊ.කන ඊශ්වරන් මහතා  අධිකරණය හමුවේ දන්වා සිටියේ මෙම චෝදනාව පවත්වාගෙන යාමට මෙම අධිකරණයට බලයක් නොමැති බවට මූලික විරෝධයක් ඉදිරිපත් කළේය. 

උතුරු පළාත් හිටපු ප‍්‍රධාන අමාත්‍ය සහ හිටපු ශ්‍රේෂ්ඨාධිකරණ විනිසුරුවරයෙකු වූ සී.වී.විග්නේෂ්වරන් මහතාට එරෙහිව අධිකරණ අපහාස පැමිණිල්ල පවත්වාගෙන යෑමට අධිකරණයට බලයක් නැතැයි සඳහන් කරමින්  ඉදිරිපත් කළ මූලික විරෝධතාව ඉකුත් 13 වැනිදා අභියාචනාධිකරණය විසින් ප‍්‍රතික්ෂේප කරන ලදී.

උතුරු පළාත් මහ ඇමැති වෙනුවෙන් ජනාධිපති නීතීඥ ඊ.කන ඊශ්වරන් ද , උතුරු පළාත් අමාත්‍ය බී.ඩෙනීෂ්වරන් වෙනුවෙන් නීතීඥ සුරේන් ප‍්‍රනාන්දු මහතා ද පෙනී සිටියහ.