(දසුන් රාජපක්ෂ)

 හිටපු ජනාධිපති මෛත්‍රීපාල සිරිසේන මහතා නොමඟ යවා අපරාධ පරීක්ෂණ දෙපාර්තමේන්තුවේ නිලධාරීන් සැකකරුවන් රඳවා තබා ගැනීමට ලිඛිත අවසර ලබාගෙන ඇති බව දේශපාලන පළිගැනීම් පිළිබඳ විමර්ශනය කරන ජනාධිපති කොමිසමේ සභාපති විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න මහතා අද (18) සඳහන් කළේය.

 ඒ සඳහා අපරාධ පරීක්ෂණ දෙපාර්තමේන්තුව ත්‍රස්තවාදය වැළැක්වීමේ පනත උපයෝගී කරගෙන ඇති බව කොමිසමේ සභාපතිවරයා පැවසීය.
 
කොමිසමේ සභාපති වරයා මේ බව පවසා සිටියේ යුධ හමුදා බුද්ධි බලකායේ කෝප්‍රල්වරයෙකු ලෙස කටයුතු කළ රවීන්ද්‍ර රූපසේන මහතා මෙම කොමිසමට කළ පැමිණිල්ලක් අද විභාගයට ගත් අවස්ථාවේදීය.
 
 එම පැමිණිල්ල මගින් ත්‍රස්තවාදය වැළැක්වීමේ පනත යටතේ තමා අත්අඩංගුවට ගෙන මාස තුනක් රහස් පොලිසිය භාරයේ තබාගෙන ඇත්තේ දේශපාලනිකව පළිගැනීමට බව  රවීන්ද්‍ර රූපසේන මහතා  සඳහන් කර ඇත.