(සුජිත් හේවාජුලිගේ සහ  අංජුල මහික වීරරත්න)

පාර්ලිමේන්තුවේ කටයුතු  කිහිපයක් සම්බන්ධයෙන් සාකච්ඡා කිරීම සඳහා කතානායක මහින්ද යාපා අබේවර්ධන මහතා විසින්  සියලු පක්ෂ නායකයෝ  පාර්ලිමේන්තු සංකීරණයට  හෙට (11) දහවල් කැඳවනු ලැබ සිටිති.

ජනාධිපතිවරයා  ලබන 18 වැනිදා පාර්ලිමේන්තුවේදී පැවැත්වීමට නියමිත රාජාසන කතාව සම්බන්ධයෙන්  දින දෙකක විවාදයක් ලබාදෙන්නැයි  එක්සත් ජාතික පක්ෂයේ නායක රනිල් වික්‍රමසිංහ සහ විපක්ෂයේ ප්‍රධාන සංවිධායක ලක්ෂ්මන් කිරිඇල්ල යන මහත්වරු කතානායකවරයාගෙන් පසුගියදා ඉල්ලීමක් කළහ. මේ සම්බන්ධයෙන් විශේෂයෙන් සාකච්ඡා කිරීම මෙම පක්ෂ නායක හමුවේ ප්‍රධාන අරමුණ බව පාර්ලිමේන්තු ආරංචි මාර්ගවලින් පැවසේ.

මෙම කල්තැබීමේ විවාදය ලබන 19 සහ 20 යන දෙදිනේදී  පවත්වන්නැයිද එම පක්ෂ නායකයන්  වැඩිදුරටත් ඉල්ලා තිබිණ.

මෙයට අමතරව තවත් වැදගත් කරුණු කිහිපයක්ද  මෙම පක්ෂ නායක හමුවේදී සාකච්ඡා කිරීමට බලාපොරොත්තු වන බව කතානායක කාර්යාලයේ නිලධාරියෙක්  ලංකාදීපයට පැවැසීය.

මේ පක්ෂ නායක හමුව ඊයේ පැවැත්වීමට නියමිතව තිබුණත් නොවැළක්විය හේතුවක් මත එය අදට කල්  ගියේය.

වාර අවසාන කෙරුණු පාර්ලිමේන්තුව  ජනාධිපති ගෝඨාභය රාජපක්ෂ මහතාගේ  ප්‍රධානත්වයෙන් ලබන 18 වෙනිදා උත්සවාකාරයෙන් යළි  විවෘත කිරීමට නියමිතය. සැසිවාරය අවසන් කිරීමත් සමග අක්‍රිය වූ කමිටු  යළි ස්ථාපනය කර  පාර්ලිමේන්තුවේ කටයුතු සාමාන්‍ය පරිදි ක්‍රියාත්මකවීම ඉන් අනතුරුව ඇරඹෙනු ඇත.