(විනීතා එම් ගමගේ)

සයිප‍්‍රසයේ ක‍්‍රියාත්මක වන සමාජ ආරක්ෂණ අරමුදල වෙනුවෙන් දායක වූ එරට වසර හයකට වඩා සේවය කරන ශ්‍රී ලාංකිකයින්ට වයස 68 ක් වූ පසු එම අරමුදලේ ප‍්‍රතිලාභවලින් සියයට 15 ක් ලබාගත හැකි වන පරිදි එම අරමුදලෙහි කොන්දේසි වෙනස් කර ඇතැයි විදේශ සේවා නියුක්ති කාර්යංශය කියයි.

එම අරමුදලේ ප‍්‍රතිලාභ මීට පෙර ලැබුණේ එරට වසර 15  ක් අඛණ්ඩව සේවය කළ විදේශිකයන්ට පමණි. ඒ සඳහා   ශ‍්‍රමිකයා තම වැටුපෙන් සියයට 8.3ක් ද හාම්පුතා සියයට 8.3 ක් ද සයිප‍්‍රස් රජය මගින් සියයට 4.9 ක් ද වශයෙන් මූලික වැටුපෙන් සියයට 21.5 ක් දායක මුදල් ගෙවිය යුතුව ඇත.

එහෙත් ශ්‍රී ලාංකිකයන්ට එරට සේවයට අවසර තිබුනේ එක් වරකට වසර 4යි මාස අටක කාලයක් පමණි. මේ  නිසා එම අරමුදලට දායක වීමෙන් ශ්‍රී ලාංකිකයන් ට කිසිදු ප‍්‍රයෝජනයක් නොලැබුණු බව විදේශ රැකියා අමාත්‍යංශයේ අද (08) පැවැති මාධ්‍ය හමුවක දී අදහස් දක්වමින් මනුෂ නානායක්කාර මහතා ප‍්‍රකාශ කළේය.

ඇමති තිලක් මාරපන මහතා මේ පිළිබඳව එරට කම්කරු අමාත්‍යවරිය මෙන්ම ජනාධිපතිවරයා ද හමුවී සාකච්ඡා කර ඇති බවත් ඒ අනුව ඉකුත් ජනවාරි පළමුවැනිදා සිට මෙසේ කොන්දේසි වෙනස් කර ඇති බවත් නානායක්කාර මහතා අමාත්‍යංශයේ ප‍්‍රකාශ කළේය.

කෙසේ වෙතත් මෙම අරමුදලේ ප‍්‍රතිලාභ දැන් ලබා ගත හැකි බවට සයිප‍්‍රසයේ සේවය කර මෙරට පැමිණ සිටින ශ්‍රී ලාංකිකයන්ට යම් පිරිසක් විසින් දන්වා ඇති බවත් එසේ එම මුදල් ගත නොහැකි අතර වසර හයක් හෝ ඊට වැඩි කාලයක් සේවය කර ඇති හා අවශ්‍ය කොන්දේසි සපුරා ඇති අයට පමණක් මේ පිළිබඳව කාර්යංශය වෙත දැනුම් දෙන්නේ නම් එම සේවකයන් වෙනුවෙන් ඉල්ලීම් කළ හැකි බවත් නානායක්කාර මහතා කීය.

වාර්ශිකව ශ‍්‍රමිකයන් 1200 ක් පමණ එරට සේවය සඳහා පිටත්ව යන අතර මේ වනවිට එහි ශ්‍රී ලාංකිකයෝ 7500 ක් පමණ සේවය කරමින් සිටිති.

සමාජ ආරක්ෂණ අරමුදලේ  ප‍්‍රතිලාභ ලබා ගැනීම කිසිවෙකුටත් මුදල් ලබා දී ලබාගත නොහැකි බවත් ඒ සඳහා කිසිදු පුද්ගලයෙකුට මුදල් ලබා නොදෙන ලෙසත් කාර්යංශය ඉල්ලීමක් කරයි.