(ෂේන් සෙනෙවිරත්න)

මැණික්හින්න පොලිස් වසමේ ඕවිස්ස ප්‍රදේශයේ නිවසක නිරෝධායන නීති උල්ලංඝනය කරමින් සාදයක් පවත්වන බවට පොලිස් හදිසි ඇමතුම් අංශයට ලැබුණු තොරතුරකට අනුව එම ස්ථානය පරීක්ෂා කිරීමට ගිය පොලිස් නිලධාරීන් පිරිසකට එල්ල වූ ප්‍රහාරයක් හේතුවෙන් තුවාල ලැබූ උප පොලිස් පරීක්ෂකවරයකු මැදවල රෝහලට ඇතුළත් කර ඇතැයි පොලිසිය කියයි.

පොලිසිය අදාළ ස්ථානයට යන විට අදාළ නිවසේ සාදයක් පැවැත්වෙමින් තිබී ඇති අතර කෝවිඩ් නිරෝධායන නීතිරීති අනුව ඒ ආකාරයේ සාදයක් පැවැත්විය නොහැකි බව පොලිස් නිලධාරීන් එහි රැස්ව සිටි පිරිසට දැනුම් දුන් අවස්ථාවේදී එය පිළිගැනීමට අකමැති වූ පිරිසක් පොලිස් නිලධාරීන් සමග බහින් බස්වීමක් සිදුව ඇති අතර ඒ අවස්ථාවේ ප්‍රහාරය එල්ල කර ඇති බවට පොලිස් පරීක්ෂණවලදී අනාවරණය වී තිබේ .

පොලිස් නිලධාරීන් ගමන් ගත් ජීප් රථයට ද පහර දී ඇති අතර ඉන් ජීප් රථයේ ඉදිරිපස වීදුරුවට ද අලාභානි සිදුව තිබේ . සිද්ධිය සම්බන්ධයෙන් සැකපිට පුද්ගලයන් 04 දෙනකු අත්අඩංගුවට ගෙන තිබෙන අතර තවත් පිරිසක් අත්අඩංගුවට ගැනීම සඳහා විමර්ශන සිදු කරමින් පවතී .