(මුදිතා දයානන්ද)

සතොස ගබඩාවල තිබූ සහල් කිලෝ 410,484 ක් සත්ත්ව ආහාරවලට වෙන් කිරීමට සිදුව ඇතැයි සතොස ආයතනයේ ප්‍රධානියෙකු පැවසීය.

මෙසේ සත්ත්ව ආහාරවලට යොමු කරන ලද සහල් අතර ආනයනික සහල් කිලෝ 388,484ක් හා දේශීය සහල් කිලෝ 22,000 ක් පවතින බවද ඔහු පැවසීය.

මෙසේ සත්ත්ව ආහාරවලට යොමුකර තිබෙන්නේ 2017 හා 2018 වසරවලදී ආනයනය කරන ලද සහල් මෙට්‍රික් ටොන් 110,000ක් අතරින් බෙදාහැරීම් නොකර ගබඩාවල ඉතිරි වු සහල් බවද එම නිලධාරියා පැවසීය.

ගන්නෝරුව සත්ත්ව නිෂ්පාදන හා සෞඛ්‍ය දෙපාර්තමේන්තුවේ පශූ වෛද්‍යවරුන් පරීක්ෂා කර බැලීමෙන් අනතුරුව මෙම සහල් සත්ත්ව අහාර ලෙස නිකුත් කිරීමට තීරණය කළ බවද ඔහු පැවසීය.

සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න මහතා ඇතුලු කණ්ඩායමක් වීරවිල, හිගුරක්ගොඩ හා කොළඹ මැක්ලම් වීදියේ සතොස ගබඩා පරීක්ෂා කළ අවස්ථාවලදී එම ගබඩාවල තිබී සත්ත්ව ආහාරවලට වෙන් කළ සහල් කිලෝ 54,25,000ක් සොයාගත් බවද පසුගිය දා වාර්තා විය.

වීරවිල සතොස ගබඩාවෙන් සහල් කිලෝ ලක්ෂ 50 ක්, හිඟුරක්ගොඩ ගබඩාවෙන් කිලෝ 406,000ක් හා මැක්ලම් වීදීයේ ගබඩාවෙන් කිලෝ 10,000 ක් වන පරිදිය.

හිඟුරක්ගොඩ ගබඩාවේ සත්ත්ව ආහාරවලට වෙන්කළ සහල් කිලෝ 56,000 ක් කල් ඉකුත් වීමට මාස දෙකකට පෙර මෙලෙස සත්ත්ව ආහාරවලට වෙන්කර තිබූ බවද මැක්ලම් වීදීයේ ගබඩාවේ තිබූ සහල් කිලෝ 19739 ක් සත්ත්ව ආහාරවලට වත් භාවිතා කළ නොහැකි තරමට කල් ඉකුත්ව තිබීම හේතුවෙන් මාළිගාවත්තේ වළ දැමීමට එහි නිලධාරීන් කටයුතු කර තිබූ බවද පසුගියදා වාර්තා විය.

පරිභෝජනයට අවශ්‍ය ප්‍රමාණයට වඩා සහල් ආනයනය කිරිම සම්බන්ධයෙන් පරීක්ෂනයක් සිදුකරන්නේ දැයි අප කළ විමසීමකදි  අභ්‍යන්තර වෙළඳ , ආහාර සුරක්ෂිතතාව සහ පාරිභෝගික සුභසාධන අමාත්‍යංශ ලේකම් ජී.කේ. එස්. එල්. රාජදාස මහතා මෙසේ පැවසීය.

     ‘‘රටේ සහල් සිඟයක් ඇති වන බවට වාර්තා වුවහොත් ඒ සම්බන්ධයෙන් වගකීම දරණ ඇමතිවරයා සහල් ආනයනය කිරීමට පෙළඹෙනවා. සහල් හිගයක් නැතිව රටට සැපයීම ඔහුගේ වගකීමක්. නමුත් ප්‍රශ්නය තිබෙන්නේ ඒවා ලංකාවට එනකොට මෙහේ අස්වනු කපලා.

අපේ රටේ වැඩි දෙනෙක් විදේශීය සහල්වලට වඩා දේශීය සහල්වලටයි කැමති. ඒ නිසා තමයි මේ සහල් අලෙවිය අඩුවෙන්නේ. ඒවා වසර කීපයක් ගබඩාවල තිබුණාම භාවිතයට ගන්න බැරිව සත්ත්ව ආහාරවලට වෙන්කරන්න සිදුවෙනවා.‘‘