(නිමල කොඩිතුවක්කු)

සජිත් පේ‍්‍රමදාස මහතා එක්සත් ජාතික පෙරමුණේ ජනාධිපති අපේක්ෂකයා වීම කිසිදු කුමන්ත‍්‍රණයකින් වැළැක්විය නොහැකි බව  අජිත් පී. පෙරේරා මහතා කොළඹදී අද (13) පැවැසීය.

ශීත කාමරවල සිට ජනාධිපති අපේක්ෂකයා තෝරනවා වෙනුවට  පක්ෂ නායක අග‍්‍රාමාත්‍ය රනිල් වික‍්‍රමසිංහ මහතාගේ ආශිර්වාදය ඇතිව ජනතාවගේ හඬින් සජිත් පේ‍්‍රමදාස මහතා ජනාධිපති අපේක්ෂකයා බවට පත් කරන බවත් ඔහු සඳහන් කළේය.

කොල්ලූපිටියේ පිහිටි ඩිජිටල් යටිතල පහසුකම් හා තොරතුරු තාක්ෂණ අමාත්‍යාංශයේ පැවති මාධ්‍ය හමුවකට එක්වෙමින් ඔහු මේ බව පැවැසීය.

පක්ෂයේ පාර්ලිමේන්තු මන්ත‍්‍රීවරුන්ගේ බහුතරය, පළාත් සභා මන්ත්‍රීවරුන්ගේ බහුතරය සහ පළාත් පාලන නියෝජිතයන්ගේ බහුතරය හිමිවී  තිබෙන සජිත් පේ‍්‍රමදාස මහතා ඊළඟ ජනාධිපතිවරයා බවට පත්වීම ස්ථීර යැයිද ඔහු සඳහන් කළේය.

එක්සත් ජාතික පෙරමුණේ පක්ෂ නායකයින්ගේ සහයෝගයත් මේ වනවිට සජිත් පේ‍්‍රමදාස මහතාට හිමිවි ඇති බවත් පැවසූ අමාත්‍යවරයා  අග‍්‍රාමාත්‍ය රනිල් වික‍්‍රමසිංහ මහතාගේ එකඟතාවය මත ඉදිරියේදී සජිත් පේ‍්‍රමදාස මහතා ජනාධිපතිවරණ අපේක්ෂකයා ලෙස නම් කරන බවත් කීය.

එමෙන්ම කෘත්‍යාධිකාරී මණ්ඩලයේ බහුතරයතක් තමන්ට අති බවට අරලියගහ මන්දිරයේ පැවති රැස්වීමකදී අග‍්‍රාමාත්‍ය රනිල් වික‍්‍රමසිංහ මහතා කළ බවට පළවන මාධ්‍ය වාර්තා තමන්ට හැගෙන පරිදි අසත්‍යයක් බවත් ඔහු වැඩිදුරටත් පැවැසීය.