(බිමල් ශ්‍යාමන් ජයසිංහ)

සෞඛ්‍ය අමාත්‍යාංශයේ රියදුරු හා සුළු සේවක රැකියා ලබා දෙන බව පවසා පුද්ගලයින් හත්දෙනෙකුගෙන් මුදල් ලබාගත් පුද්ගලයෙකු බදුරලිය ප්‍රදේශයේදී අද (13) අත්අඩංගුවට ගත්බව මතුගම පොලිසිය කියයි.

එම රැකියාවක් ලබාදීම සඳහා රුපියල් ලක්ෂ දෙකක මුදලක් ඉල්ලා ඇති සැකකරු ඒ සඳහා අත්තිකාරම් මුදල් වශයෙන් රුපියල් හතලිස් දහසේ සිට හැත්තෑදහස දක්වා  පුද්ගලයින් හත් දෙනෙකුගෙන් මුදල් ලබා ගෙන දිනෙන් දින මගහැර ඇතැයි පොලිසිය කියයි.

පුද්ගලයින් හත් දෙනෙක් රැකියා බලාපොරොත්තුවෙන් මෙම පුද්ගලයාට මුදල් ලබා දී ඇති බව ලද පැමිණිලි වලින් සනාථ වන බවත් එය තවත් වැඩි වනු ඇතැයි පොලිසිය කියයි.

එම පුද්ගලයින් දොඩංගොඩ,වැලිපැන්න,බදුරලිය,මතුගම ප්‍රදේශවල පදිංචි පුද්ගලයින් බව පොලිසිය කියයි.

මෙම සිද්ධියට සෞඛ්‍ය අමාත්‍යාංශයේ ඉහළ තනතුරක් දරන පුද්ගලයෙකුගේ සම්බන්ධීකරණ ලේකම්වරයෙකු සහ කොළඹ පදිංචි තවත් අයෙකු සම්බන්ධ බව පොලිසියට අනාවරණය වී තිබේ.