“සීඅයිඩීය මගේ වරප්‍රසාද කඩකරලා’’

(සුජිත් හේවාජුලිගේ සහ  අංජුල මහික වීරරත්න )

අපරාධ පරීක්ෂණ පරීක්ෂණ දෙපාර්තමේන්තුවේ නිලධාරීන්  2018-2019 අතර කාලයේදී තමාගේ දුරකතන සංවාද වලට රහසිගතව සවන්දී ඇති බවත්  මහේස්ත්‍රාත්වරයකුගේ අවසරයකින් තොරව  එසේ කටයුතු කිරීම නිසා තමාගේ පෞද්ගලික  අයිතිය මෙන්ම  පාර්ලිමේන්තු වරප්‍රසාද උල්ලංඝණයවී ඇති බවත්  සමගි ජන බලවේගයේ කොළඹ දිස්ත්‍රික් මන්ත්‍රී පාඨලී චම්පික රණවක මහතා පාර්ලිමේන්තුවේදී  අද (21) පැවැසීය.

ඔහු මෙසේ පැවසුවේ  කතානායකවරයාගේ අවසරය ඇතුව  වරප්‍රසාද ප්‍රශ්නයක් මතු කරමිනි.

දුරකථන සංවාද  අපරාධ පරීක්ෂණ දෙපාර්තමේන්තුවට ලබා දීම නිසා  දුරකථන සේවා සැපයුම්කරුවන්ද තමාගේ වරප්‍රසාද කඩ කර ඇති බව පැවසූ  රණවක මහතා තමාගේ වරප්‍රසාද කඩ කළ  අපරාධ පරික්ෂණ දෙපාර්තමේන්තුවේ නිලධාරින් සහ  දුරකථන සේවා සැපයුම්කරුවන් පාර්ලිමේන්තුවේ වරප්‍රසාද කමිටුව හමුවට කැඳවා මූලික පරීක්ෂණයක් සිදුකරන ලෙස තමා කතානායකවරයාගෙන් ඉල්ලා සිටින බවද  පැවැසුවේය.

එය ශ්‍රේෂ්ඨාධිකරණය හමුවේ   දඩුවම් කළ හැකි වරදක් බවද  ඔහු සඳහන් කළේය.

එසේම මේ සම්බන්ධයෙන් නීතිපතිවරයාගෙන් වාර්තාවක් කැඳවා  එම වාර්තාව මැතිසබයට ඉදිරිපත්  කරන ලෙස කතානායකවරයාගෙන් ඉල්ලා සිටින බවද  පාඨලී චම්පික රණවක මහතා පැවැසීය.

නාගරික සංවර්ධන අමාත්‍යාංශය අමාත්‍යාංශයේ සිදු වී යැයි කියන වංචාවක් සම්බන්ධයෙන්  තොරතුරු විමසීම සඳහා අපරාධ පරීක්ෂණ දෙපාර්තමේන්තුවට පැමිණෙන ලෙස දැනුම්දෙමින්  තමාට නොතීසියක් එවා තිබූ බවත් ඒ අනුව තමා  පසුගිය සැප්තැම්බර් මස 24 වැනිදා  එම දෙපාර්තමේන්තුව හමුවේ පෙනී සිටි බවත් මන්ත්‍රීවරයා සඳහන් කළේය.

තමාගේ දුරකතන සංවාදවලට  සවන් දී ඇති බව එහිදී කෙරුණු  කරුණු විමසීම්වලදී  තමාට වැටහුණු බවද  ඔහු පැවසුවේය.