ශ්‍රී ලංකාවේ සිට බ්‍රිතාන්‍යයට පැමිණෙන දෙමළ ජනතාවගෙන්  85% ක් පමණ ව්‍යාජ  ගුවන් බලපත්‍ර සහ ව්‍යාජ වීසා පත් ලබා ගනිමින් එරටට පැමිණෙන බව බ්‍රිතාන්‍යයේ පළවන “ස්කයි නිව්ස් ” ප්‍රවෘත්ති සේවය අද (18) වාර්තා කළේය.

 
බ්‍රිතාන්‍යයේ  මානව හිමිකම්  ක්‍රියාකාරිනියක් ලෙස කටයුතු කරන අම්බිහෙයි ශීවරත්නම් මහත්මිය එම පුවත් සේවය වෙත අදහස් අක්වමින් මේ බව ප්‍රකාශ කළාය.
 
නීත්‍යානුකුල ලෙස බ්‍රිතාන්‍යයට පැමිණීමට තිබෙන අපහසුතාව සහ ශ්‍රී ලංකාවේ ජීවත් වීමට ඇති බිය හේතුවෙන් මෙම පිරිස මෙලෙස ව්‍යාජ ගුවන් බලපත්‍ර සහ වීසා මඟින් බ්‍රිතාන්‍යයට පැමිණෙන බවද ඇය වැඩිදුරටත් පැවසුවාය.
 
මහා බ්‍රිතාන්‍යය යුරෝපා සංගමයෙන් ඉවත් වන බ්‍රෙක්සිට් ගිවිසුම ඉදිරියේදී  ක්‍රියාත්මක කළහොත් මෙම පිරිසට එරට රැකියා අවස්ථා හිමි වන බවත් බ්‍රිතාන්‍යයේ  සරණාගතභාවය ඉල්ලා ඇති පිරිසට ද ඔවුන්ගේ සිහිනය සැබෑ කර ගත හැකි බවද ඇය පෙන්වා දුන්නාය.
 
කෙසේ වෙතත් මෙලෙස ව්‍යාජ ගුවන් බලපත්‍රය සහ ව්‍යාජ වීසා පත් ලබා ගනිමින් බ්‍රිතාන්‍යයට පැමිණි පිරිස සැලකූ විට විශාල ශ්‍රම බලකායක් වන බවත්, ඔවුන්ට නීත්‍යානුකූලභාවය ලබා දෙන්නේ නම් බ්‍රිතාන්‍යයට මහත් වැඩදායී පිරිසක් බිහි කර ගත හැකි බවද බ්‍රිතාන්‍ය මානව හිමිකම් ක්‍රියාකාරිනී අම්බිහෙයි ශීවරත්නම් මහත්මිය කියා සිටින්නීය.
 
නීති විරෝධීව බ්‍රිතාන්‍යයට පැමිණ සිටින නම් සඳහන් නොකළ කාන්තාවක් ස්කයි නිව්ස් පුවත්සේවය වෙත අදහස් දක්වමින් කියා සිටියේ තමන් විවාහ විමට බලාපොරොත්තුවෙන් සිටින තරුණයා එල්.ටී.ටී.ඊ ත්‍රස්ත සංවිධානයේ සමාජිකයෙකු බැවින් තමන්ට ලංකාවේ ජීවත් වීමට තිබෙන බිය නිසා මෙලෙස නිතී විරෝධි ලෙස බ්‍රිතාන්‍යයට පැමිණි බවයි.
ඇය මෙහිදී නිශ්චිත කාලයක් පිළිබඳ අනාවරණය නොකරන අතර, ඇයට තවමත් ඉංග්‍රීසි භාෂාව මනා ලෙස හැසිරවීම අපහසු බව ද සඳහන් කර සිටින්නීය. තමන් නැවත ශ්‍රී ලංකාවට ගියහොත් තමන්ව නිසැකවම ඝාතනයට ලක්වන බවද අදාළ කාන්තාව සඳහන් කර ඇත.

තමන්ට බ්‍රිතාන්‍යයේ ජීවත්වීමට ඉඩ සලස්වා දෙන්නේ නම් ස්වෙච්ඡා ක්‍රියාකාරිනියක් ලෙස බ්‍රිතාන්‍යයට සේවය කිරීමට කැමැත්තෙන් සිටින බව ඇය වැඩිදුරටත් සඳහන් කර තිබේ.
 
(125)