(ඩයනා උදයංගනී)

ශ්‍රී ලංකා නිදහස් පක්‍ෂ 68 වන සංවත්සර සැමරුම සඳහා ශ්‍රී ලංකා පොදුජන පෙරමුණට ද ආරාධනා පත‍්‍රයක් යොමු කරන බව එක්සත් ජනතා නිදහස් සන්ධානයේ මහලේකම්, පාර්ලිමේන්තු මන්ත‍්‍රී මහින්ද අමරවීර මහතා පැවසීය.

කොළඹ, සුගතදාස ගෘහස්ථ ක‍්‍රීඩාංගණයේදී සැප්තැම්බර් 3 වැනිදා පස්වරු 2.00ට පැවැත්වීමට නියමිත පක්‍ෂ සංවත්සරය සඳහා සන්ධානය සමඟ කටයුතු කරන සියලූ දේශපාලන පක්‍ෂවල ලේකම්වරුන් වෙත ද ආරාධනා පත‍්‍ර යොමු කරන බව මහලේකම්වරයා සඳහන් කළේය.

එසේ නොමැතිව කිසිම පුද්ගලයකුගේ නමට ආරාධනා යොමු කරන්නේ නැතැයි කී අමරවීර මහතා එම පක්‍ෂ විසින් නම් කරන නියෝජිතයින් සංවත්සර සැමරුම සඳහා සහභාගී වනු ඇතැයි ද කියා සිටියේය.

මහින්ද අමරවීර මහතා මේ බව පැවසුවේ කොළඹ, ඩාර්ලි පාරේ පිහිටි ශ්‍රී ලංකා නිදහස් පක්‍ෂ මූලස්ථානයේදී අද (28) පැවති එක්සත් ජනතා නිදහස් සන්ධාන මාධ්‍ය හමුවේදී මාධ්‍යවේදියකු නැගූ පැනයකට පිළිතුරු දෙමිනි.

පක්‍ෂ සංවත්සරයට හිටපු ජනාධිපති මහින්ද රාජපක්‍ෂ මහතාට හෝ ශ්‍රීලනිපයේ සිට වර්තමානයේදී පොදුජන පෙරමුණට හා එක්ව සිටින මන්ත‍්‍රීවරුන්ට ආරාධනා කර තිබෙනවාද? යනුවෙන් මෙහිදී මාධ්‍යවේදියා ප‍්‍රශ්න කළේය.

පක්‍ෂයේ අයට මෙයට සහභාගී වීමට ආරාධනා අවශ්‍ය නැති බවත්, පක්‍ෂය වෙනුවෙන් ඔවුන්ට සහභාගී විය හැකි බවත් අමරවීර මහතා වැඩිදුරටත් කියා සිටියේය.