(කාංචන කුමාර ආරියදාස)
 
ගලේවෙල අලුත්වැව ප්‍රදේශයේ විසක්  ශරීරගත කර සුනඛයන්  10 දෙනෙකු පමණ ඝාතනය කර ඇතැයි ප්‍රදේශවාසීන් ගලේවෙල පොලීසියට අද (24)  පැමිණිලි කර තිබේ.
 
අද  පෙරවරුවේ තැන තැන සුනඛයන්ගේ මළ සිරුරු දැකීමත් සමඟ ප්‍රදේශවාසීන් මේ පිළිබඳව දැඩි විමසිල්ලෙන් සොයා බැලීමක් සිදු කර තිබේ.
 
එහිදී  නිවෙස්වල සිටි සුනඛයන් දස දෙනෙකුගේ පමණ  සිරුරු සොයා ගැනීමට හැකි වී තිබේ.
 
ගලේවෙල අළුත්වැව ප්‍රදේශයේ සත්ව ගොවිපලක හිමිකරුවන් විසින් මෙම සතුන් දිගින් දිගටම ඝාතනය කරන බවත් මෙවර මෙම සතුන්ට විසක් ශරීර ගත කර මරා දමන්නට ඇතැයි ප්‍රදේශවාසීහු චෝදනා කරති.

මීට පෙර ද පහර දී සහ වෙඩි තබා ප්‍රදේශයේ සුනඛයන් ගොවිපල  හිමිකරුවන් විසින් මරා දමන බවට පොලිස් හදිසි ඇමතුම් අංශයට පවා පැමිණිලි කොට ඇතැයි ප්‍රදේශවාසීහු කියති.

මෙම සුනඛයන් දිගින් දිගටම ඝාතනය කිරීම සම්බන්ධයෙන් පොලිසියට පැමිණිලි කළ විට එම ව්‍යාපාරිකයන් ප්‍රදේශවාසීන්ට  පහරදීමට සහ ඝාතනය කරන බවට තර්ජනය කරන බව ද ඔවුහු කියති.
 
මෙම සුනඛයන් තැන තැන  මැරී වැටී ඇති අයුරු පෙන්වන ප්‍රදේශවාසීන් මේ පිළිබඳව ගලේවෙල පොලීසියට ද පැමිණිලි කර ඇතත් පොලිස් කණ්ඩායමක් පැමිණ පරීක්ෂාකර හෙට ( 25)  උදෑසන 9 ට  මෙම  අයිතිකරුවන්ට පොලිසියට පැමිණෙන ලෙස දැනුම් දුන්නේ යැයි ඔවුහු පවසති.
 
අලුත්ගම ප්‍රදේශයේ ඉතා අමානුෂික ආකාරයෙන් නිවෙස් වල සුරතලයට ඇති කළ සුනඛයන් මරා දැමීම සම්බන්ධයෙන් ඔවුහු දැඩි කනස්සල්ලට පත්ව හැඬූ කඳුළින් කියා සිටියේ මෙවැනි අපරාධ සඳහා වහාම නීතිය ක්‍රියාත්මක කරන ලෙසය.

ගලේවෙල පොලීසියේ ඉහළ පොලිස් නිලධාරියකු කියා සිටියේ  පොලිස් හදිසි ඇමතුම් අංශයට ලැබුණු පැමිණිල්ලක් අනුව ප්‍රදේශයේ පරික්ෂා කිරීම සඳහා පොලිස් කණ්ඩායමක් යැවූ බව ය කෙසේ වෙතත් තවදුරටත් මෙම සුනඛයන් මිය යෑම සම්බන්ධයෙන් පරීක්ෂණ කටයුතු පවත්වන බවද පොලිසිය ඒ මහතා වැඩිදුරටත් ප්‍රකාශ කළේය.