විශ්වාස භංග යෝජනාව සම්බන්ධයෙන් තමාට තීරණයක් ගැනීමට නම්  මන්ත්‍රීවරුන්ගේ නමින් හෝ ඉලෙක්ට්‍රොනික ක්‍රමය භාවිත කරමින්  ඡන්ද ගණනය කළ යුතු බව ජනාධිපති මෛත්‍රීපාල සිරිසේන මහතා අද (18) පැවැති පක්ෂ නායක රැස්වීමේ දී  පැවසීය.


 එය එසේ කළහොත් තමාටත් රටේ උගත් බුද්ධිමත් මහජනතාව මෙන්ම අන්තර්ජාතිකවද  වඩාත්  පිළිගත හැකි ක්‍රමයක් යැයිද හෙතෙම පෙන්වා දුන්නේය.


 එමෙන්ම  රජයක් වෙනස් කිරීම වැනි ප්‍රබල තීරණ ගැනීමේදී  ස්ථාවර නියෝගවල සඳහන්ව තිබුණත් හඬ අනුව බහුතරය තිරණය කිරීම  කාලෝචිත නොවන බවද  විනිවිද භාවයකින් තොර බවද ජනාධිපතිවරයා මෙහෙදී සඳහන් කළේය.


මෙම රැස්වීම සඳහා  ආරාධනා ලැබ තිබු සියලු පක්ෂ  තම නියෝජනත්වය ලබා දුන් අතර ජනතා විමුක්ති පෙරමුණ පමණක් සහභාගී  නොවන බව ජනාධිපතිවරයාට ලිඛිතව දන්වා තිබු අතර ජනධිපතිවරයා එය සභාවට ඉදිරිපත් කළේය.


එමෙන්ම හෙට(19)   පැවැත්වෙන  පාර්ලිමේන්තුවේදී  ක්‍රියා කළ යුතු ආකාරය පිළිබඳව පාර්ලිමේන්තුවේදී පැවැත්වීමට නියමිත පක්ෂ නායක රැස්වීමේදී තිරණය කිරීමට නියමිත අතර  ගැටුම්වලින් තොරව සාමකාමී අන්දමින්  කටයුතු කිරිමට ද   මෙහිදී  එකඟතාවකට පැමිණියේය.


මෙම හමුව පැය දෙකකට ආසන්න කාලයක් ජනාධිපතිවරයාගේ මුලිකත්වයෙන් ලේකම් කාර්යාලයේදී  පැවැත්විණි.

(36698)

(ඡායාරූපය - ජනාධිපති මාධ්‍ය අංශය)