(වසන්ත චන්ද්‍රපාල)

වෙඩි තැබීමක් සම්බන්ධයෙන් පොතුවිල් මහේස්ත්‍රාත් අධිකරණයට ඉදිරිපත් කළ වනජීවි නිලධාරීන් පස්දෙනෙකුට පොතුවිල් මහේස්ත්‍රාත් මොහොමඩ් රාපි මහතා ඇප අද (24) ඇප ලබා දුන්නද එයට පැමිණි විරෝධතාවයක් හේතුවෙන් යළි ඇප අහෝසි මහේස්ත්‍රාත්වරයා පියවර ගත්තේය.

පසුගිය 21 වැනිදා පානමින් මුහුදු ගිය තිදෙනෙකු මුහුදේ රළ පහර සහ සුළං වැඩිවීමත් සමඟම කුමන ජාතික වන උද්‍යානයට  අයත් ගොඩබිමට  පැමිණ ඇති අතර වර්ෂාව අඩුවෙනතුරු මෙම පිරිස පැය දෙකක පමණ කාලයක් මුහුදු වෙරළේ සිටියදී හදිසියේම එම ස්ථානයට පැමිණි වනජීවී නිලධාරීන් පිරිසක් මොවුනට වෙඩි තබා තිබේ.

එම අවස්ථාවේ එම ධීවරයින් බියට පත්ව බෝට්ටුවට නැග මුහුදට යන අවස්ථාවේ වනජීවි නිලධාරින් විසින් බෝට්ටුවට වෙඩි තබා ඇති අතර එහිදි බෝට්ටුවේ  සිටි ධිවරයකුට වෙඩි වැදී ඇත.

පසුව තුවාලකරු පානම රෝහලට ඇතුළත් කර ඇති අතර පානම රෝහලින් පොතුවිල් රෝහලට ඇතුළත් කර පොතුවිල් මූලික රෝහලින් අම්පාර මහා රෝහලට යවා තිබේ.

මෙම නිලධාරීන්ට ඇප නියම කිරීමෙන් පසු එයට උරණ වූ පිරිසක් මහේස්ත්‍රාත් අධිකරණය තුළදී වනජීවී නිලධාරීන්ට විරෝධය දැක්වීමත් සමඟ උණුසුම් තත්ත්වයක් ඇතිවිය.

පසුව මහේස්ත්‍රාත්වරයා විසින් වනජීවී නිලධාරීන්ට දුන් ඇප අහෝසි කර ලබන 6 වැනි දින දක්වා රක්ෂිත බන්ධනාර ගතකරන ලෙස නැවත නියෝග කළේය.

අම්පාර රෝහලේ දී මෙම ධීවරයාට ශල්‍යකර්මයක් කර ඇති අතර දැනට අම්පාර මහා රෝහලේ දැඩි සත්කාර ඒකකයේ ප්‍රතිකාර ලබමින් සිටී.

පසුව ධීවරයින් මේ පිළිබඳව පානම පොලිසියට පැමිණිලි කර ඇති අතර වනජීවි නිලධාරින් ද බී වාර්තාවක් මගින් පොතුවිල් මහේස්ත්‍රාත් අධිකරණයට කරුණු ඉදිරිපත් කර තිබේ.