( උපාලි ආනන්ද)

බදු පදනම මත ලබා දුන් රුපියල් කෝටි නවයකට අධික වටිනාකමකින් යුත් අනුරාධපුර මහවීදියේ පිහිටි ඉඩමකට ව්‍යාජ ඔප්පුවක් සකසා එය පෞද්ගලික බැංකු දෙකකට තබා ණයක් ලබා ගත් බව කියන සිද්ධියට සම්බන්ධ බවට චෝදනා ලැබ සිටින අනුරාධපුරයේ  නීතිඥවරියක ජූලි 7 වැනිදා විශේෂ විමර්ශනයක් සදහා ශ්‍රේෂ්ඨාධිකරණයට කැඳවා තිබේ.

ශ්‍රේෂ්ඨාධිකණයේ නියෝජ්‍ය රෙජිස්ට්‍රාර් සී හේරත් මහතා විසින් අංක එස්සී/පී/63/2019 දරණ ලිපිය මගින් අදාල නීතිඥවරිය  මෙම විමර්ශණය සඳහා  කැදවා ඇත්තේ ඕපනායක  පනාන ඉලුක්කුඹුර  අංක 104/01/ ඒ ලිපිනයේ  ජේ බී රොහාන් අනුරාධ මහතා  අගවිනිසුරු ජයන්ත ජයසූරිය මහතාට  කරන ලද ලිඛිත පැමිණිල්ලක් අධ්‍යයනය කිරීමෙන් පසුවය.

එම නීතිඥවරිය මෙම විමර්ශනය සදහා නියෝජ්‍ය රෙජිස්ට්‍රාර් සී හේරත් මහතා විසින් මෙලෙස   කැඳවා  ඇත්තේ අගවිනිසුරුවරයාගේ නියෝගයකට  අනුවය.

මෙම සිද්ධිය සම්බන්ධයෙන් අනුරාධපුර කොට්ඨාස අපරාධ විමර්ශන අංශය විමර්ශන මෙහෙයවා පසුව පැවරූ නඩුවක් දැනට අනුරාධපුර මහේස්ත්‍රාත් අධිකරණය හමුවේ විභාග වෙමින් පවතින අතර තවත් සිවිල් නඩුවක් අනුරාධපුර දිසා අධිකරණයේ විභාග වෙමින් පවතී.

උතුරු මැද පළාත් බාර ජ්‍යෙෂ්ඨ නියෝජ්‍ය පොලිස්පති නන්දන මුනසිංහ මහතාගේ විශේෂ නියෝගයක් මත පොලිස් අධිකාරි විජිත ද අල්විස් මහතා විසින් ද මෙම ව්‍යාජ ඉඩම් ඔප්පු සැකසීමේ සිද්ධිය සම්බන්ධයෙන් තවත් විමර්ශනයක් සිදු කරනු ලබයි.