(යොහාන් භාසුර)

ලිට්‍රෝ සමාගමේ රටපුරා ප්‍රධාන අළෙවි නියෝජිතයන් සතුව ගෑස් සහිත ගෘහස්ථ ගෑස් සිලින්ඩර ලක්‍ෂ දෙකක් ඇති බවත් ලිට්‍රෝ ගෑස් හිඟයකින් තොරව ලබන අගෝස්තු මස දක්වා සැපයීමට තොග ඇති බවත් ලිට්‍රෝ ගෑස් සමාගමේ සභාපති තෙෂාර ජයසිංහ මහතා පැවසීය

ශ්‍රී ලංකාව පුරා සිටින ලිට්‍රෝ ගෑස් ප්‍රධාන අළෙවි නියෝජිතයන් 42 ක සතුව මේ වන විට ගෘහස්ථ ගෑස් සිලින්ඩර ලක්‍ෂ දෙකක් ඇති බව කී සභාපතිවරයා ඊට අමතරව දිනකට ගෑස් පිරවූ සිලින්ඩර 80,000 ක් අළෙවි නියෝජිතයන්ට සපයන බවත්ය.

ලීටර් 18 ගෑස් සිලින්ඩරයක මිල කැබිනට් මණ්ඩලයේ අනුමැතියෙන් අඩු කිරීමත් සමඟ ග්‍රාමනිලධාරී කොට්ඨාස මට්ටමින් සිටින දාහතදාස් ගණනක අළෙවිකරුවන් ගෑස් ඇනවුම්කිරීම අත්හිටුවීමෙන් ගෑස් හිඟයක් ප්‍රදර්ශනය වන බවත් පාරිභෝගිකයන් ද මිල අඩු වේ යැයි ගෑස් පරිභෝජනය අඩු කර ඇති බවත් සභාපතිවරයා පැවසීය.

මේ මස 20 වැනිදා සිට දින තුනක් තුළ සිලින්ඩර 40,000 ක් පමණ අළෙවි වී ඇති බවත් එය සාමාන්‍ය දිනක අළෙවියෙන් සියයට 50 අඩු වීමත් බවත් සභාපතිවරයා කීය.