(බිමල් ශ්‍යාමන් ජයසිංහ සහ  සුමිත්   ප්‍රේමතිලක) 

පානදුර හිරණ තැඹිලි උයන  නිවසකට දොරගුලු කඩා  ඇතුළු වූ   නාදුනන  පිරිසක් නිවෙස් හිමි  ව්‍යාපාරිකයාට පහරදී   පැහැරගෙන ගොස් ඇතැයි හිරණ පොලිසිය කියයි. 

නිවසට  කඩාවැදුණු පිරිස නිවසේ තිබූ රූපවාහිනි යන්ත්‍ර දෙකක් සිසිටිවි කැමරා පද්ධතියේ (ඩ් වි ආර්) ගබඩා පද්ධතිය ද රැගෙන ගොස් ඇතැයි පොලිසිය කියයි. 

ව්‍යාපාරිකයා පැහැරගත් දිනම ඔහුගේ මවගේ ජංගම දුරකථනයට  ඇමතුමක් ලබාදී තිබු නාඳුනන පුද්ගලයකු  ඇයගේ පුතු තිස්සමහාරාම ප්‍රදේශයේ  රඳවා ගෙන ඇති බවත්  මුදාහැරීමට රුපියල් ලක්ෂ 50 ක් ලබා දෙන ලෙසත් පවසා තිබූ බව පොලිසිය කියයි. 

පැහැරගත් බව කියන ව්‍යාපාරිකයා තිස්සමහරාම  ප්‍රදේශයට ගොස් ගොවීන්ගෙන් කුළුබඩු මිලදීගෙන ඒවා විකිණීමේ ව්‍යාපාරයක් සිදු කරන අයකු බවත් ඔහු විසින් ලබාගත් මුං ඇට  ඇතුළු කුළුබඩු තොගයක් වෙනුවෙන්  රුපියල් ලක්ෂ 75 ක මුදල ගෙවීම පැහැර හැරීම නිසා  මෙම පැහැර ගැනීම  සිදුකර ඇති  බවත් මූලික  විමර්ශනවලදී අනාවරණ වූ බව පොලිස් නිලධාරියෙක් පැවැසීය.  

ව්‍යාපාරික පැහැර ගැනීමට පැමිණි පිරිස අත්අඩංගුවට  ගැනීම සඳහා  හිරණ පොලිසියට අමතරව විශේෂ පොලිස් කණ්ඩායම්  කීපයක්  යොදවා ඇතැයි උසස් පොලිස් නිලධාරියෙක් පැවැසීය.