(හිරාන් ප්‍රියංකර ජයසිංහ)
 
ලක්ෂ 12 කට ආසන්න වටිනාකමකින් යුත් හෙරොයින් තොගයක් සමග මෝටර් රථ දෙකක්, යතුරු පැදි දෙකක්, ලක්ෂ තුනකට ආසන්න මුදලක් සමග ප්‍රධාන පෙලේ හෙරොයින් ජාවාරම්කරුවකු පුත්තලම පොලිස් මත්ද්‍රව්‍ය කාර්යාංශය මගින් අද ( 12 ) අලුයම අත් අඩංගුවට ගෙන ඇත.
 
මෙසේ අත් අඩංගුවට ගෙන ඇත්තේ පුත්තලම තිල්අඩිය ප්‍රදේශයේ පදිංචි කරුවකු වන 42 හැවිරිදි  අයෙකි.
 
මෙම සැකකරු කුලී පදනමට යොදා ගත් මෝටර් රථ යොදා ගනිමින් මෙම ජාවාරම සිදුකර ඇති බව කියයි.
පුත්තලම පොලිස් මත් ද්‍රව්‍ය කාර්යාංශයට ලැබුණ තොරතුරක් මත පුත්තලම නගරයේ හෙරොයින්  බෙදාහැරීම සදහා මෝටර් රථයකින් ගමන් කරමින් සිටියදී රැකවල් ලා සිට අත් අඩංගුවට ගත් බව කියයි. සැකකරු සන්තකයේ තිබු හෙරෝයින් ග්‍රෑම් 75 ක් සමග හෙරෝයින් ජාවාරමෙන් අද අලුයම ලබා ගත් රුපියල් 2 62,500  මුදලක් ද සොයාගෙන ඇත.
 
අත් අඩංගුවට ගත් සැකකරුගෙන් ප්‍රශ්න කිරීමේදි හෙළි වී ඇත්තේ මෙම සැකකරු එල්.ටී.ටී.ඊ. සංවිධානයට අයත් ගිනි අවි අලෙවි කිරීමේ ජාවාරමක්ද මෙහෙය වු අයකු බවයි.අදාල සැකකරු මෙම ගිනි අවි ජාවාරම සම්බන්ධව ත්‍රස්ත විමර්ශන ඒකකය මගින් 2008 වසරේ ටී.56 ගිනි අවි තුනක් පිස්තෝලයක් සමග අත් අඩංගුවට ගෙන තිබු බවත් 2018 වසරේදි නිදහස් කර ඇති බවය.
 
අත් අඩංගුවට ගත් සැකකරු හෙරොයින්, වාහන සමග මුදල් පුත්තලම මුලස්ථාන පොලිසියට බාර දී  තිබේ .
පුත්තලම පොලිසය මගින් මෙම සැකකරු පුත්තලම අධිකරණයට ඉදිරිපත් කිරිමට නියමිතය.