(හර්ෂණ තුෂාර සිල්වා)

යුද අභ්‍යාසයක් සඳහා  ඕස්ටේ‍්‍රලියානු නාවික හමුදාවට අයත් යාත‍්‍රා හතරක් සහ හමුදා ගුවන් යානයක් ලබන සතියේදී මෙරටට පැමිණීමට නියමිතය. 

ඕස්ටේ‍්‍රලියානු ප‍්‍රධානත්වයෙන් පැවැත්වෙන මෙම යුද අභ්‍යාසයට රටවල් හතක් සහභාගී වන අතර එය ශ්‍රී ලංකාවෙන් ආරම්භ වේ.

කොළඹ අද (15) පැවැති මාධ්‍ය හමුවකදී එම කරුණු අනාවරණය කෙරුණි. 

යුද අභ්‍යාසයට සහභාගී වීම සඳහා  ඕස්ටේ‍්‍රලියානු ති‍්‍රවිධ හමුදා සාමාජිකයන් 1,000ක් මෙරටට පැමිණෙන අතර එය ශ්‍රී ලංකාව සහ  ඕස්ටේ‍්‍රලියාව අතර පැවැත්වෙන විශාලතම යුද අභ්‍යාසය යැයි පැවසේ. 

‘‘ශ්‍රී ලංකාවට අපට ඉතාමත් වැදගත් පාර්ශවකරුවෙක්. ශ්‍රී ලංකාව සහ  ඕස්ටේ‍්‍රලියාව ඉන්දීය සාගරය සහ සමුද්‍රීය ආරක්ෂාව සම්බන්ධයෙන් සමාන අදහස් දරනවා. එමෙන්ම ඉන්දීය සාගරයේ ආරක්ෂාව සම්බන්ධයෙන් සහයෝගයෙන් වැඩ කටයුතු කරනවා’’ යැයි මාධ්‍ය හමුවේදී අදහස් දැක්වූ ශ්‍රී ලංකාවේ වැඩබලන  ඕස්ටේ‍්‍රලියානු මහ කොමසාරිස් ජොන් පිල්ප් මහතා පැවැසීය. 

ඕස්ටේ‍්‍රලියානු නෞකා, ගුවන් යානය සහ ආරක්ෂක අංශ සාමාජිකයන් මාර්තු මස 23 වැනිදා ශ්‍රී ලංකාවට පැමිණෙන අතර යුද අභ්‍යාසය මාර්තු මස 29 වැනිදා දක්වා පැවැත්වීමට නියමිතය.

ශ්‍රී ලංකාවට පැමිණෙන  ඕස්ටේ‍්‍රලියානු හමුදා මාර්තු 26 වැනිදා ඉන්දියාවට යන අතර ඉන් පසු මැලේසියාව, තායිලන්තය, වියට්නාමය, ඉන්දුනීසියාව සහ සිංගප්පූරුව බලා යනු ඇත.

ඡායාරූප ඒ.එෆ්.පී.