නාලක සංජීව දහනායක
 
නිල කාලය අවසන්ව ඇති පළාත් සභාවල ආණ්ඩුකාරවරුන් පරිපූරක ඇස්තමේන්තු ඉදිරිපත් කරමින් මුදල් වියදම් කිරීමට එරෙහිව අධිකරණ ක‍්‍රියාමාර්ග ගන්නා ලෙස හිටපු ජනාධිපති මහින්ද රාජපක්‍ෂ මහතා විසින් ඒකාබද්ධ විපක්‍ෂය නියෝජනය කරන පක්‍ෂ නායකයන්ට අද (24) උපදෙස් දී තිබේ.  


පළාත් සභාවේ අනුමැතියකින් තොරව මුදල් වියදම් කිරීමට ආණ්ඩුකාරවරුන්ට බලයක් නොමැති බැවින් පරිපූරක ඇස්තමේන්තු ඉදිරිපත් කරමින් මුදල් වියදම් කිරීම නීතිවිරෝධී ක‍්‍රියාවක් බව පක්‍ෂ නායකයන් විසින් මෙහිදී හිටපු ජනාධිපතිවරයාට දැනුම් දී ඇත.


ඒ පිළිබඳව සොයා බලා නීතිමය ක‍්‍රියාමාර්ග ගන්නා ලෙස රත්නපුර දිස්ත‍්‍රික් පාර්ලිමේන්තු මන්ත‍්‍රිනි පවිත‍්‍රා වන්නිආරච්චි මහත්මියට හා සබරගමුව පළාත් සභාවේ හිටපු මහ ඇමැති මහීපාල හේරත් මහතාට හිටපු ජනාධිපති මහින්ද රාජපක්‍ෂ මහතා විසින් උපදෙස් දී තිබේ.


එමෙන්ම ඉදිරි ජනාධිපතිවරණ අපේක්‍ෂකයා පිළිබඳව පාර්ලිමේන්තු මන්ත‍්‍රී කුමාර වෙල්ගම මහතා දක්වන අදහස් සම්බන්ධයෙන් එතරම් තැකීමක් නොකරන ලෙසත් හිටපු ජනාධිපතිවරයා විසින් මෙහිදී ඒකාබද්ධ විපක්‍ෂයේ පක්‍ෂනායකයන්ට දැනුම්දී ඇත.


ඒකාබද්ධ විපක්‍ෂයේ පක්‍ෂ නායක රැස්වීම කොළඹ, විජේරාම මාවතේ පිහිටි හිටපු ජනාධිපතිවරයාගේ නිල නිවසේදී අද (23) පස්වරුවේ පැවැත්විණි.