(තිළිණි ද සිල්වා සහ රංජන් කටුගම්පොළ)

මත්ද්‍රව්‍ය චෝදනාවන්ට වරදකරු වී මරණ දඬුවම ලැබූවන් අතරින් හතර දෙනෙක්ට එම දඬුවම ක‍්‍රියාත්මත කිරීමට ජනාධිපති මෛත‍්‍රීපාල සිරිසේන මහතා ගෙන ඇති තීරණය අත්හිටුවමින් නියෝගයක් නිකුත් කරන මෙන් ඉල්ලා මාධ්‍යවේදී මාලින්ද සෙනෙවිරත්න මහතා විසින් ගොනු කර ඇති රිට් පෙත්සම විභාගයට ගන්නවාද නැද්ද යන්න පිළිබඳ තීන්දුව ප‍්‍රකාශ කිරීම ලබන ඔක්තෝබර් 31 වැනිදා තෙක් කල් තැබීමට අභියාචනාධිකරණය අද (17)  තීන්දු කළේය.

මෙම පෙත්සම විභාග කිරීම සඳහා අවසර ලබා දෙනවාද නැද්ද යන්න අද (17) දින ප‍්‍රකාශයට පත් කිරීමට නියමිතව තිබිණි.

කෙසේ නමුත් ඔක්තෝබර් 30 වැනිදා තෙක් මරණ දඬුවම ක‍්‍රියාත්මක කිරීම වළකාලමින් ශ්‍රේෂ්ඨාධිකරණය විසින් අතුරු නියෝගයක් නිකුත් කර ඇති හෙයින් මෙම අවස්ථාවේ තම තීන්දුව ප‍්‍රකාශ නොකිරීමට අභියාචනාධිකරණයේ පංච පුද්ගල විනිසුරු මඩුල්ල තීන්දු කර ඇත.

මරණ දඬුවම ක‍්‍රියාත්මක කරමින් කිසිම පුද්ගලයෙකු එල්ලා මැරීම වළක්වාලන නියෝගයක් නිකුත් කරන්නැයි ඉල්ලා හිටපු පුවත්පත් කර්තෘවරයෙකු වූ මාලින්ද සෙනවිරත්න මහතා ගොනු කළ රිට් පෙත්සම අභියාචනාධිකරණ සභාපති යසන්ත කෝදාගොඩ , දීපාලි විජේසුන්දර , ජනක් ද සිල්වා , අචල වෙංගප්පුලි සහ අර්ජුන ඔබේසේකර යන මහත්ම මහත්මීන් ගෙන් සමන්විත අභියාචනාධිකරණ විනිසුරු මඩුල්ල හමුවේ සලකා බැලිණි.

මෙහි වගඋත්තරකරුවන් ලෙස බන්ධනාගාර කොමසාරිස් ජනරාල් , වැලිකඩ බන්ධනාගාර අධිකාරීවරයා , අලුගෝසුවා ඇතුළු පිරිසක් නම් කරනු ලැබ සිටිති.