බිඟුන් මේනක ගමගේ 

මාධ්‍යවේදීන්ගේ ඝාතන හා අතුරුදන්වීම් සම්බන්ධයෙන් සවිස්තරාත්මක තොරතුරු පවතී නම් ඒවා ගැන ශ්‍රී ලංකා මානව හිමිකම් කොමිසම විමර්ශන ආරම්භ කිරීමට සූදානම් යැයි එහි සභාපතිනි ආචාර්ය දීපිකා උඩගම මහත්මිය තම සංවිධානයට පැවැසී යැයි නිදහස් මාධ්‍ය ව්‍යාපාරය නිවේදනයක් නිකුත් කරමින් සඳහන් කරයි.

අපරාධවලට ලක්වූ මාධ්‍යවේදීන් හා මාධ්‍ය ආයතනවලට යුක්තිය ඉටුකිරීමට මැදිහත් වන්නැයි ඉල්ලා නිදහස් මාධ්‍ය ව්‍යාපාරයේ විධායක කමිටු සාමාජිකයන් පසුගිය 29 වැනිදා මානව හිමිකම් කොමිසමේ සාමාජිකයන් මුණගැසුණු අවස්ථාවේදී ආචාර්ය දීපිකා උඩගම මහත්මිය මේ බව සඳහන් කර ඇත.

ඒ අනුව ජනමාධ්‍යවේදීන්ගේ ඝාතන, අතුරුදන්වීම් හා පැහැරගෙනයාම් ගැන දන්නා වැදගත් තොරතුරක් වේ නම් fmmsrilanka@gmail.com     යන විද්‍යුත් ලිපිනයට හෝ කැඳවුම්කරු, නිදහස් මාධ්‍ය ව්‍යාපාරය, අංක 96, බර්නාඩ් සොයිසා මාවත, නාරාහේන්පිට, කොළඹ 05 ලිපිනයට යොමු කරන්නැයි එහි කැඳවුම්කරු සී.දොඩාවත්ත මහතා එම නිවේදනයෙන් ඉල්ලා සිටී.

ජනමාධ්‍යවේදීන් හා ජනමාධ්‍ය ආයතනවලට එරෙහි අපරාධ සම්බන්ධයෙන් නීතිමය පියවර නොගැනීම සම්බන්ධයෙන් නිදහස් මාධ්‍ය ව්‍යාපාරය සිදුකරන අධ්‍යයනයකින් සැකැසූ සංක්ෂිප්ත වාර්තාවක් ද මානව හිමිකම් කොමිසමට බාරදුන්නේ යැයි ද එම නිවේදනයේ සඳහන් වේ.

නීතිමය ක්‍රියාමාර්ග ඉදිරියට ගෙනයාමට ඇති බාධා, අධිකරණ පද්ධතියේ ගැටලු, දේශපාලන කැපවීමක් නොමැතිවීම, ආරක්ෂක හමුදා සහ අතුරු හමුදා සම්බන්ධකම්, මාධ්‍ය පාරිභෝගිකයන්, සිවිල් සමාජය හා ආයතන හිමිකාරින් ප්‍රමාණවත් මැදිහත්වීමක් නොකිරීම වැරැදිකරුවන්ට දඬුවම් කිරීමට බලපා ඇති ප්‍රධාන දුර්වලතා හැටියට එම අධ්‍යයනයේදී හඳුනාගෙන ඇතැයි ද නිදහස් මාධ්‍ය ව්‍යාපාරය නිකුත් කළ එම නිවේදනයේ වැඩිදුරටත් සඳහන් වේ.