(කාංචන කුමාර ආරියදාස)

මුදලට සූදු ක්‍රීඩාවේ යෙදුණු ලග්ගල ප්‍රාදේශීය සභාවේ සභාපතිවරයා ඇතුළු 8 දෙනෙකු සැකපිට ලග්ගල පොලිසිය විසින් අද (15) අත්අඩංගුවට ගත් බව පොලිසිය කියයි.

ඔවුන් සන්තකයේ තිබී රුපියල් 24,000 කට වැඩි මුදල් ප්‍රමාණයක් ද පොලිස් බාරයට ගෙන තිබේ.

මෙසේ සභාපතිවරයා සමඟ අත්අඩංගුවට පත් එක් පුද්ගලයකු සන්තකයේ තිබී හෙරොයින් ග්‍රෑම් එකයි මිලිග්‍රෑම්  221 ප්‍රමාණයක් ද සොයා ගෙන ඇතැයි පොලිසිය කියයි.

මෙසේ හෙරොයින් සමග අත්අඩංගුවට ගෙන ඇත්තේ ලග්ගල විල්ගමුව ආදී ප්‍රදේශ වලට හෙරොයින් ගංජා බෙදාහැරීමේ ජාවාරමක නිරත "යකා "නැමැති අන්වර්ත නාමයෙන් හඳුන්වන සුරංග දිසානායක නමැති  පුද්ගලයෙකි.

කාලයක් තිස්සේ ඉතා සූක්ෂම ලෙස මෙම සූදු ක්‍රීඩාව  කරගෙන යන බවට ප්‍රදේශයේ කාන්තාවන් සහ විවිධ සංවිධාන පොලිසියට නිරන්තරයෙන් තොරතුරු ලබා දෙන බවත් එහෙත් ඉතා සූක්ෂම ලෙස ස්ථාන මාරු කරමින් තැරැව්කරුවන් අතරමග දමා මහා පරිමාණයෙන් මෙම සූදු ක්‍රීඩාව පවත්වාගෙන යාමෙන් බරපතල ප්‍රශ්න රැසක් පවතින බව පොලීසිය වැඩිදුරටත් සඳහන් කරයි.