විනීතා එම් ගමගේ

මැදපෙරදිග සේවය කරන ශ්‍රී  ලාංකික ශ‍්‍රමිකයන් වෙනුවෙන් නිරෝධායන මධ්‍යස්ථාන, රෝගී වූවන් වෙනුවෙන් සෞඛ්‍ය පහසුකම් හා ආරක්ෂිත නිවස්න සැපයීමට වහා කටයුතු කරන ලෙස  රාජ්‍ය අංශය නියෝජනය කරන වෘත්තිය සමිති රජයෙන් ඉල්ලීමක් කරයි.

විදේශ ශ‍්‍රමිකයන් වෙනුවෙන් ශ්‍රී ලංකා විදේශ සේවා නියුක්ති කාර්යංශයේ ඇති බිලියන ගණනක් වන සුභ සාධක අරමුදලින් මුදල් සපයා මෙම ශ‍්‍රමිකයන්ට පහසුකම් සැළැස්විය යුතු යැයි ද ඔවුහු කියා සිටිති.

රාජ්‍ය අංශයේ වෘත්තිය සමිති 20 ක් එක්ව මෙම ඉල්ලීම කර ඇති අතර විශේෂයෙන් කුවේට් හි පවතින තත්ත්වය පිළිබදව රජයේ විශේෂ අවධානය යොමු කළ යුතු බවට ද ඔවුහු අවධාරණය කරති.

එසේ නොකර මේ ශ‍්‍රමිකයන් වෙනුවෙන් පහසුකම් සැපයීමට නොහැකි බව කියමින් ඔවුන් ගෙන්වා නොගෙන සිටීම හා ඔවුන් පිළිබද නිහඩ පිළිවෙතක් අනුගමනය කිරීම පිළිකුලෙන් හෙලා දකින බව ද එම වෘත්තිය සමිති නිවේදනයක් නිකුත් කරමින් කියා සිටී.

කුවේට් හි පමණක්  19000 කට අධික ශ්‍රී ලාංකිකයන් පිරිසක් සිටින අතර, මෙම ශ‍්‍රමිකයන් වසංගත තත්වය තුළ මේ වන විට අඩු පහසුකම් යටතේ බරපතල පීඩාවට ලක්ව සිටින බව වාර්තා වෙතැයි ද  එසේම වීසා අවසන්වී මේ වන විට නීත්‍යානුකූල නොවන ලෙස එම රටවල රැුදී සිටින පිරිසට එම රජයන් විසින් සහන කාලයක් ලබා දී ඇති අතර, එම සහන කාලය අවසන්වීමට පෙර ඔවුන් ගෙන්වා ගැනීම රජයේ වගකීමක් වන බව ද එම නිවේදනයේ සදහන් වේ.

විධිමත් වැඩපිළිවෙලක් යටතේ මෙම මැද පෙරදිග ශ‍්‍රමිකයන් ගෙන්වා ගැනීමට හා රෝගයට ගොදුරු වී සිටින ශ‍්‍රමිකයන් සඳහා පහසුකම් සලසා ඔවුන්ගේ ජීවිත වසංගත අවදානමෙන් මුදවා ගැනීමට කටයුතු කරන ලෙසත් රජයෙන් ඉල්ලා සිටින බව ද එහි සදහන්ව ඇත.