(ඩී. ජී. සුගතපාල)      
                                      
පුද්ගලයෙකු පැහැරගෙන ගොස් සිරකර තැබීම සම්බන්ධයෙන් ගාල්ල දිස්ත්‍රික් පාර්ලිමේන්තු මන්ත්‍රී නිශාන්ත මුතුහෙට්ටිගම මහතා ඇතුළු විත්තිකරුවන් පස් දෙනෙකුට එරෙහිව පවරා ඇති නඩුව විභාගයට ගත් අවස්ථාවේ පළමුවෙනි විත්තිකාර මුතුහෙට්ටිගම මහතාගේ ඇඟිලි සළකුණු ලබා ගැනීමට දකුණු පළාත්බද ගාල්ල මහාධිකරණ විනිසුරු ඩබ්ලිව්. පී. එස්. නිශ්ශංක මහතා අද (21)  නියෝග කළේය.                                                       

ඇඟිලි සළකුණ ලබාගැනීමට කොළඹ  අපරාධ වාර්තා කොට්ඨාසයේ ඇඟිලි සළකුණු රෙජිස්ටාර් කාර්යාලයේ නිලධාරියෙකු කැඳවා තිබිණි.   
                             
අධි චෝදනා බාර දීමෙන් පසු පළමුවෙනි විත්තිකරුගේ ඇඟිලි සළකුණු ලබා ගැනීමට ගිය අවස්ථාවේ ඔහුගේ ඇඟිලිවල ස්වභාවය අනුව එම සළකුණු ලබා ගැනීමට අපහසු බව පොලිස් නිලධාරීන් පවසා ඇති බව නඩුව විභාගයට ගත් අවස්ථාවේ රජයේ නිතිඥවරිය කියා සිටියාය. එනිසා කොළඹ අපරාධ වාර්තා කොට්ඨාසයේ ඇඟිලි සළකුණු රෙජිස්ටාර් කාර්යාලයේ නිලධාරියෙකු ගෙන්වා ඇඟිලි සළකුණු ලබා ගැනීමට නියෝගයක් නිකුත් කරන ලෙස රජයේ නිතිඥවරිය  ඉල්ලා සිටියාය.   
         
ඒ අනුව මහාධිකරණ විනිසුරුවරයා මෙම නියෝගය නිකුත් කළේය.   
                                 
නිශාන්ත මුතුහෙට්ටිගම, උඩුගම විතානගේ ලලිත් ධම්මික, සෙනවිරත්න ඈපාගේ දිමුතු ප්‍රදිප්, නිරාජ් අසංක ජයවර්ධන සහ විදානකාරියකරණගේ හසිත අකලංක යන අය මෙම නඩුවේ විත්තිකරුවෝ වෙති.               

වැඩිදුර විභාගය මාර්තු 21වන දිනට කල් තබන ලදී.