(රංජිත් රාජපක්ෂ)                       

බාලදක්ෂ කඳවුරකට සහභාගී වීම සඳහා නිවසේදී පුහුණුවීම් සිදුකළ පාසල් සිසුවෙකු ගෙල සිර වී ජිවිතක්ෂයට පත් වී ඇති බව පොලිසිය පැවසීය.

මෙසේ ජිවිතක්ෂයට පත් වී ඇත්තේ නාවලපිටිය කුරුදුවත්ත කරගල පදිංචි නිමොද් ඉෂාන් චන්ද්‍රරත්න නැමති 14 හැවිරිදි පාසල් සිසුවෙකි.

නාවලපිටිය කුරුදුවත්ත ගිරාඋල්ල මධ්‍යම මහ විද්‍යාලයේ 10 වන වසරේ අධ්‍යාපනය ලබන ජිවිතක්ෂයට පත් සිසුවා ඔහුගේ නිවසේ කාමරය තුළ ලණුවක් ආධාරයෙන් බාලදක්ෂ කඳවුරට සහභාගි වීම සඳහා පුහුණුවීම් සිදුකර ඇත.

අවදානම්ව එම පුහුණුවීම් සිදු කරන අවස්ථාවේ මිය ගිය සිසුවාගේ මව විසින් සිසුවාට අවවාද කර ඇති බව පොලිසිය පැවැසීය.

මවගේ අවවාද නොපිලිගත් සිසුවා ලණුවක් ආධාරයෙන් සිදු කරන බාල දක්ෂ ක්‍රියාවක් පුහුණු වීම සිදු කරමින් සිටින අවස්ථාවේ ඔහු පුහුණුවීම් සිදු කළ ලණුව ඔහුගේ ගෙලේ සිර වී සිසුවා ජීවිතක්ෂයට පත් වී ඇති බව කුරුදුවත්ත පොලිසිය පැවැසීය.

මියගිය සිසුවාගේ පශ්චාත් මරණ පරීක්ෂණය නාවලපිටිය මූලික රෝහලේ අධිකරණ වෛද්‍යවරයා විසින් සිදු කර ඇති අතර එම මරණය ගෙල සිර වී සිදු මරණයක් බවට අධිකරණ වෛද්‍යයවරයා සඳහන් කර ඇත.