(යොහාන් භාසුර)

සන්ධානය ආණ්ඩුවක් තුළ ආණ්ඩුවේ ඇතැම් ක්‍රියාමාර්ග ප්‍රසිද්ධියේ විවේචනය කරන ඇමතිවරුන්ට සහ මන්ත්‍රීවරුන්ට එරෙහිව පළමු පියවර ලෙස නීතිය ක්‍රියාත්මක කිරීම හොඳ දෙයක් නොවන බවත් විනය මාර්ගවලට ගොස් නීතිය යෙදීමට වඩා වර්තමානයේ රට මුහුණ දෙන ගැටලුවල බරපතල ස්භාවය තේරුම් ගෙන සියලු දෙනාම සද්භාවයෙන් එකඟ වූ අරමුණට අවතීරණය වීම වඩාත් හොඳම පියවර බවත් විදේශ අමාත්‍ය මහාචාර්ය ජී. එල්. පීරිස් මහතා පැවසීය.

බලය තිබූ පළියට පාව්ච්චි කිරීම හොඳ දෙයක් නොවන නිසා අලුත් වසරේ නැවුම් විදියට සිතා කටයුතු කරනු ඇතැයි බලාපොරොත්තු වන බව කී විදේශ අමාත්‍ය මහාචාර්ය ජී. එල්. පීරිස් මහතා සෑම පක්‍ෂයකම ව්‍යවස්ථාවේ මෙවැනි තත්වයන්ට ගතහැකි නීතිමය පියවර තිබෙන්නාක් මෙන්ම ශ්‍රී ලංකා පොදුජන පෙරමුණ ව්‍යවස්ථාවෙත් ඒ සඳහා වගන්ති ඇති බව ද සඳහන් කළේය.

සෑම පාර්ලිමේන්තු සැසිවාරයකට පෙරම ආණ්ඩු පක්‍ෂය අගමැතිතුමාගේ ප්‍රධානත්වයෙන් රැස්වන අවස්ථාවේදී ඕනෑම කෙනෙකුට විවේචනය කිරීමේ අවස්ථාව ඇති බවත් එළියට ගිහිල්ලා මයික් එකක් අල්ලපු හැම තැනම රජය විවේචනය කරමින් ජනප්‍රිය නොවන තීරණයක් පිළිබඳව “අපි ඕකට නෑ අපි වගකීම ගන්නෙත් නෑ අපිට වගකීම ගන්නත් බෑ” යැයි ප්‍රකාශ කරමින් ආණ්ඩුවේ සිටීම පරස්පර විරෝධී බවත් අමාත්‍යවරයා කීය.

බෙත්තරමුල්ල, නෙළුම් මාවත පොදුජන පෙරමුණ පක්‍ෂ කාර්යාලයේදී අද (24) පැවැති මාධ්‍ය හමුවේදී විදේශ අමාත්‍ය මහාචාර්ය ජී. එල්. පීරිස් මහතා එසේ පැවසීය.