(මුදිතා දයානන්ද)

දැන් මහබැංකු බැඳුම්කර ගනුදෙනු සම්බන්ධයෙන් වෝහාරික විගණනයේ වාර්තාව නොවැම්බර් 16ට පෙර රටට හෙළි කරන ලෙස විගණකාධිපතිගෙන් ඉල්ලා සිටින බව ජනතා විමුක්ති පෙරමුණේ දේශපාලන මණ්ඩල සභික, පාර්ලිමේන්තු මන්ත‍්‍රි සුනිල් හඳුන්නෙත්ති මහතා අද (13) පැවසීය.

ඔහු මෙසේ පැවසුයේ පැලවත්තේ පිහිටි ජනතා විමුක්ති පෙරමුණේ ප‍්‍රධාන කාර්යාලයේදී පැවති මාධ්‍ය හමුවකදීය.

මෙම වාර්තාව එළි දක්වන්නේ නම් අද සුපිරිසිදු දේශපාලනඥයින් වගේ වේදිකාවල කෑ ගසන බොහෝ දෙනෙකුගේ ඇත්ත ස්වරූපය ජනතාවට දැනගත හැකිවනු ඇතැයිද ඔහු පැවසීය.

මහබැංකු බැඳුම්කර ගනුදෙනුවලින් රටට පාඩු සිදුව තිබෙන්නේ 2015න් පසුව පමණක් නොවන අතර ඉන් පෙරද එවැනි පාඩු සිදුව ඇති බවද ඒ අනුව 2002 සිට 2015 දක්වා බැඳුම්කර ගනුදෙනු සම්බන්ධයෙන් විදේශ ආයතන කීපයක් සම්බන්ධ කරගනිමින් කොටස් තුනක් වශයෙන් හා 2015 පසු ගනුදෙනුව වෙනමත් විගණනය සිදුකර ඇති බවද ඔහු පැවසිය. 

ජනාධිපතිවරණයක් රටේ පවතින මේ වෙලාවේ මෙම වාර්තාව එළිදැක් වුවහොත් තමන්ගේ හා තම දරුවන්ගේ අනාගතය ගැන නිවැරදි තීන්දුවක් ගන්න ජනතාවට අවස්ථාවක් ලැබෙන බවද ඔහු පැවසීය.

මෙය මේ වෙලාවේ රටට හෙළිදරව් කිරීමට විගණකාධිපතිවරයාට ධෛර්යයක් ඇතැයි තමන් විශ්වාස කරන බවද හඳුන්නෙත්ති මහතා පැවසීය.