(ඩී.ජී.සුගතපාල)
 
වැලිකඩ බන්ධනාගාරයේ පුහුණු අංශයේ ප්‍රධාන ජේලර්වරයාට වෙඩි තබා ඝාතනය කිරිමේ සිද්ධිය පාතාල කල්ලි සාමාජිකයින් අතර ඇතිවු මත ගැටුමක ප්‍රතිඵලයක් බවට සැකකරන බව පොලිසිය පවසයි.

මෙසේ ඝාතනය කර ඇති මෙරෙඤ්ඤ තිළිණ රුවන් තිහාර ජයරත්න (44)නමැති  ජේලර්වරයා තිදරු පියෙකි.

ඔහු රාජකාරි නිමවා පැමිණ  අම්බලන්ගොඩ දුම්රිය පොලෙන් බැස යතුරු පැදියෙන් තම නිවසට යමින් සිටියදි  යතුරු පැදියකින් පැමිණි නාඳුනන තුවක්කු කරුවන් විසින් කුලිගොඩ හන්දියේදි වෙඩි තබා එම ස්ථානයේම ඝාතනය කර පලාගොස් තිබේ.

පොලිස් පරික්ෂණවලදි අනාවරණය වන ආකාරයට අම්බලන්ගොඩ ගල්දූව ප්‍රදේශයේ පදිංචිව සිටි මෙම ජේලර්වරයා මෙයට වසර තුනකට පෙර කුලිගොඩ නිවසේ පදිංචියට පැමිණ ඇති අතර ඒ වනවිට ගාල්ල බන්ධනාගාරයේ සේවයේ කර ඇත.

පසුගිය වසරේ ඔක්තෝබර් 19වනදින මිටියාගොඩ පොලිසියේ අපරාධ විමර්ශණ අංශයේ නිලධාරින්  විසින් මහවෙල ප්‍රදේශයේ හෙරොයින් ජාවාරම්කරුවන්ගේ තිප්පලක් වැටලිමට ගිය අවස්ථාවේ මෙම ජේලර්වරයාද එහිසිට යතුරු පැදියදමා පලාගොස්   ඇත. එහිදි පොලිසිය විසින් යතුරු පැදිය පොලිස් බාරයට ගෙන ඇත.

ඒ අනුව මාස කිහිපයක් වැඩ තහනමට ලක්ව සිටි ඔහු මෙයට මාස තුනකට පමණ පෙර  නැවත සේවයෙහි පිහිටුවා වැලිකඩ බන්ධනාගාරයේ පුහුණු අංශයේ ප්‍රධාන ජේලර්වරයා ලෙස ස්ථාන මාරුවක් ලබාදි තිබේ.

මියගිය ජේලර්වරයා පාතාල කල්ලි සමග සම්බන්ධකම් පවත්වමින් සිටියේද මෙම ඝාතනය පාතාල කල්ලි සමග ඇතිවු මත ගැටුමක ප්‍රතිපලයක් ලෙස සිදු කලේද යන්න සම්බන්ධයෙන් පරික්ෂණ පවත්වන බවද පොලිසිය පවසයි.
 
මියගිය ජේලර්වරයාගේ පශ්චාත් මරණ පරික්ෂණය කරාපිටිය රෝහලේදි අද පැවැත්විමට නියමිතය.

සිද්ධිය වූ ස්ථානය සහ ඒ අවට සියලුම ආරක්ෂිත කැමරා මේ වනවිට පොලිස් බාරයට ගෙන ඇති අතර ගාලුදිසා බාර නියෝජ්‍ය පොලිස්පති නුවන් වෙදසිංහ මහතා විසින් අම්බලන්ගොඩ පොලිසිය සමග විශේෂ පොලිස් නිලධාරි  කණ්ඩායම් කිහිපයක් යොදවා පරික්ෂණ ආරම්භ කරඇත.