(එෆ්.අස්ලම්)
 
වකුගඩු අකර්මණ්‍ය වූ රෝගීන්ට රුධිර කාන්දුපෙරණයක් වෙනුවට පරිතාන කාන්දුපෙරණ (Continuous Ambulatory Peritoneal dialysis) ඒකකයක් බදුල්ල පළාත් මහ රෝහලේ ස්ථාපිත කර තිබේ.

මෙම ඒකකය ලබන (3)වනදා විවෘත කිරීමට නියමිත අතර මෙමගින් ඌව පළාතේ වකුගඩු රෝගීන්ට අමතරව දකුණ සබරගමුව නැගෙනහිර පළාත්වල රෝගීන්ට ද සෙත සැලසේ.

පරිතාන කාන්දුපෙරණ ඒකක මහනුවර, මාලිගාවත්ත, අනුරාධපුර ඇතුළු රෝහල් කිහිපයක පමණ ස්ථාපිත කර ඇති අතර ඌව පළාතට ස්ථාපිත කර ඇති එකම පරිතාන කාන්දුපෙරණ ඒකකය මෙය වේ.

වකුගඩු අකර්මණ්‍ය වූ රෝගීන්ට පරිතාන කාන්දුපෙරණය මගින් අපහසුතාවකින් තොරව බහිස්‍රාවී ද්‍රව්‍ය ඉවත්කර ගැනීමට හැකිවන බවත් රුධිර කාන්දුපෙරණය මෙන් සතියකට දෙවරක් රෝහල්ගත වීමේ අවශ්‍යතාවක් නැති බවත් බදුල්ල පළාත් මහ රෝහලේ වකුගඩු රෝග විශේෂඥ වෛද්‍ය උදාන රත්නපාල මහතා සදහන් කළේය.

සුළු ශල්‍යකර්මයක් කරමින් උදර කුහරයට ඇතුළු කරන නළයක් මගින් විශේෂිත තරලයක් උදරයට ඇතුළත් කිරීම මින් සිදුවන බවත් වකුගඩුවලට එකතුවන පොටෑසියම්,යූරියා ඇමෝනියා වැනි බහිස්‍රාවී අපද්‍රව්‍ය එම තරලයේ රැදෙන බවත් එය පැය 6කට 8කට වරක් රෝගියාටම පහසුවෙන් ඉවත් කර ගැනීමඨ හැකි බවත් වෛද්‍යවරයා සදහන් කළේය.

කෙසේ නමුත් පරිතාන කාන්දුපෙරණ ක්‍රියාදාමය සදහා රෝගියා සුදුසුකම් කිහිපයක් සපුරාතිබිය යුතු බවත් ඒවා නම් මෙම ක්‍රියාදාමය තනිව සිදුකර ගැනීමට හැකි මනා අවබෝධයක් මූලිකවම රෝගියා තුළ තිබිය යුතු බවත් දෑස් පෙනීම දුර්වල නොවීම හා දෑත් කාර්යක්ෂමව ක්‍රියාත්මක කිරීමට හැකිවිය යුතු බවත් විෂබීජ නොමැති ස්ථානයක වෙනම කුට්ටියක් රෝගියාටම තිබීය යුතු බවත් විශේෂඥ වෛද්‍යවරයා සදහන් කළේය.

මන්ද මෙම ක්‍රියාදාමය නිසි පරිදි සිදුකර ගැනීමට අපොහොසත් වීමක් හෝ විෂබීජ ශරීරගත වීමක් සිදුවේ නම් එතුළින් රෝගියාගේ ජීවිතයට පවා අනතුරක් විය හැකි බවත් මෙනිසා ඉහත සුදුසුකම් සපුරාලීම අනිවාර්ය බවත් හෙතෙම සදහන් කළේය.

බදුල්ල පළාත් මහ රෝහලේ ස්ථාපිත කර ඇති පරිතාන කාන්දුපෙරණ ඒකකයේ ප්‍රථම කාන්දුපෙරණය පසුගිය 19 වනදා රෝහලේ පිළිකා විශේෂඥ ශල්‍ය වෛද්‍ය නිරෝෂණ අටුළුගම මහතා විසින් සිදුකරන ලද සාර්ථක ශල්‍යකර්මයකින් පසුව වකුගඩු රෝග ඒකකයේ විශේෂඥ වෛද්‍ය උදාන රත්නපාල මහතා ප්‍රමුඛ වෛද්‍ය කණ්ඩායම විසින් සිදුකරන ලදී.

මෙම ක්‍රියාදාමය සදහා මූලික වශයෙන් මසකට 120,000ක මුදලක් වැය වන අතර එම මුදල රජය විසින් දරනු ලබයි.

(බදුල්ල පළාත් මහ රෝහලේ වකුගඩු රෝග විශේෂඥ වෛද්‍ය උදාන රත්නපාල මහතා)