( තිළිණි ද සිල්වා සහ රංජන් කටුගම්පොළ )

හිටපු ඇමැති රිෂාඞ් බදියුදීන් මහතා ගොනු කළ මූලික අයිතිවාසිකම් පෙත්සම විභාගයට නොගෙනම ඉවත දැමීමට ශ්‍රේෂ්ඨාධිකරණය අද (7) තීන්දු කළේය.

පාස්කු ඉරුදින සිදු වූ ත්‍රස්ත ප්‍රහාරය සම්බන්ධ කුමන හෝ කරුණක් මත  හා වෙනත් ත්‍රස්තවාදී ක්‍රියාවක් සම්බන්ධයෙන් අසත්‍ය චෝදනා ඉදිරිපත් කර තමා අත්අඩංගුවට ගැනීමේ සූදානමක් ඇති බැවින්, එය වළක්වාලන අතුරු  නියෝගයක් නිකුත් කරන ලෙස ඉල්ලා මෙම අයිතිවාසකම් පෙත්සම ගොනු කර තිබිණි.

මෙම පෙත්සම සම්බන්ධයෙන් නීතිපතිවරයා ගොනු කළ මූලික විරෝධතා පිළිගනිමින් ශ්‍රේෂ්ඨාධිකරණය තීන්දුව ප්‍රකාශයට පත් කළේය.

බුවනෙක අළුවිහාරේ , එල්.ටී.බී දෙහිදෙණිය සහ එස්.තුරේරාජා යන මහත්ම මහත්මීන්ගෙන් යුතු ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් විසින් මෙම තීන්දුව ලබා දෙන ලදී.

මෙලෙස අත්අඩංගුවට ගැනීමේ අවධානම මගින් ආණ්ඩුක්‍රම ව්‍යවස්ථාවෙන් තහවුරු කර ඇති ආසන්නතම මූලික අයිතිවාසිකම් උල්ලංඝනය වන බවට තීරණය කරන ලෙසත්, ඒ වෙනුවෙන් රුපියල් කෝටි පහක වන්දි මුදලක් ඉල්ලා හිටපු අමාත්‍ය හා සමස්ත ලංකා මහජන කොංග්‍රසයේ නායක රිෂාද් බදියුදීන් මහතා ගොනු කළ පෙත්සමේ වගඋත්තරකරුවන් වශයෙන් අපරාධ පරීක්ෂණ දෙපාර්තමේන්තුවේ විශේෂ පරීක්ෂණ ඒකකයේ ස්ථානාධිපති රවින්ද්‍ර විමලසිරි, අපරාධ පරීක්ෂණ දෙපාර්තමේන්තුවේ ස්ථානාධිපති, අපරාධ පරීක්ෂණ දෙපාර්තමේන්තු අධ්‍යක්ෂක , නියෝජ්‍ය පොලිස්පති නුවන් වෙදසිංහ, වැඩබලන පොලිස්පති සී.ඩී.වික්‍රමරත්න, නීතිපතිවරයා නම් කරනු ලැබ සිටිති.

ඒ අනුව එම ආසන්නතම මූලික අයිතිවාසිකම් කඩ වී ඇති බවට ප්‍රකාශ කරන ලෙසත් , මෙම පෙත්සම විභාගයට ගන්නා ලෙසත් , වන්දි ලෙස රුපියල් කෝටි පහක මුදලක් අය කර දෙන ලෙසත් පෙත්සම්කරු සිය පෙත්සම මගින් ශ්‍රේෂ්ඨාධිකරණයෙන් ඉල්ලා සිටී.

එසේම පාස්කු ඉරුදින ප්‍රහාරය හෝ වෙනත් ත්‍රස්ත ක්‍රියාකාරකමක් සම්බන්ධයෙන් අත්අඩංගුවට ගැනීම වළක්වාලන අතුරු නියෝගයක් නිකුත් කරන්නැයි ද පෙත්සම්කාර හිටපු අමාත්‍යවරයා සිය පෙත්සමෙන් ඉල්ලා සිටී.

පෙත්සම්කරු වෙනුවෙන් නීතීඥ ගෞරි සංගරි තවරාසා මහත්මියගේ උපදෙස් මත ජනාධිපති නීතීඥවරුන් වන ෆායිස් මුස්තාෆා සහ අනුජ ප්‍රේමරත්න යන මහත්වරුන් පෙනී සිටියහ.

නීතිපති වෙනුවෙන් නියෝජ්‍ය සොලිසිටර් ජනරාල් නෙරීන් පුල්ලේ මහතා පෙනී සිටියේය.