(බිඟුන් මේනක ගමගේ) 
 
 
පාර්ලිමේන්තුවට ඉදිරිපත් කර තිබෙන ප්‍රතිත්‍රස්ත පනත ඡන්ද විමසීමක් සඳහා යොමු වුවහොත් එයට එරෙහිව ඡන්දය භාවිත කරන්නැයි ඉල්ලමින් පෙරටුගාමී සමාජවාදී පක්ෂය සියලුම පාර්ලිමේන්තු මන්ත්‍රීවරුන්ට ලිපියක් යොමුකර ඇත.
 
 
උතුරු නැගෙනහිර සන්නද්ධ ක්‍රියාකාරීත්වය දඩමීමා කරගෙන ත්‍රස්තවාදය වැළැක්වීමේ පනත දශක 4ක් කාලයක් තිස්සේ භාවිත කිරීමෙන් ජන සමාජයේ මූලික මානව අයිතීන් රැසක් උල්ලංඝනය වී ඇතැයි ද එය අහෝසි කරනු වෙනුවට ආණ්ඩුව නව ප්‍රතිත්‍රස්ත පනතක් හඳුන්වාදීමට උත්සාහ කිරීම පෙරටුගාමී සමාජවාදී පක්ෂය හෙළාදකින්නේ යැයිද පක්ෂයේ ප්‍රචාරක ලේකම් දුමින්ද නාගමුව මහතාගේ අත්සනින් යුතුව නිකුත් කර ඇති එම ලිපියේ සඳහන් වේ.
 
 
මෙම නව ප්‍රතිත්‍රස්ත පනතට 2018 සැප්තැම්බර් 11 වැනිදා කැබිනට් අනුමැතිය ලැබී ඇතැයි ද පාර්ලිමේන්තුවේ ආංශික අධීක්ෂණ කාරක සභාවල සාකච්ඡාවට ලක් වූ බවද එය ඉදිරියේදී පාර්ලිමේන්තුවේ ඡන්ද විමසීමට භාජනය කිරීමට නියමිත යැයි ද පෙරටුගාමී සමාජවාදී පක්ෂය සඳහන් කරයි.
 
 
මෙම නව පනතින් මෙතෙක් නීතියෙන් අර්ථ දක්වා තිබූ උද්ඝෝෂණ, මහජන විරෝධතා ආදිය පවා ත්‍රස්තවාදය හැටියට අර්ථකතනය කර ඇතැයි ද එය සම්මත වුවහොත් වෘත්තිය සමිති, ගොවි සමිති හා ශිෂ්‍ය සංගම් පවා ත්‍රස්ත සංවිධාන හැටියට නම් කිරීමේ අනතුරක් ඇතැයි ද එම ලිපියේ සඳහන් වේ.
 
 
ආණ්ඩුවේ ක්‍රියාකාරකම් විවේචනය කිරීම පවා එමගින් ත්‍රස්තවාදී ක්‍රියා හැටියට අර්ථකතනය කිරීමට ඉඩ ඇතැයි ද එය ලංකාවේ නීති ඉතිහාසයේ බරපතලම මර්දන උත්සාහය යැයි පවසන පෙරටුගාමී සමාජවාදී පක්ෂය එවැනි මර්දන නීතියක් සම්මත වීමට ඉඩහැරියහොත් එය මන්ත්‍රීවරුන් මහජන නියෝජිතයන් හැටියට තෝරා පත්කරනු ලැබූ ජනතාවගේ අයීන් හා අභිලාෂ පාවාදීමක් වනු ඇතැයි ද පවසයි.
 
 
එනිසා යෝජිත ප්‍රතිත්‍රස්ත පනතට එරෙහිව ඡන්දය භාවිතා කරන්නැයි සියලුම පාර්ලිමේන්තු මන්ත්‍රීවරුන්ගෙන් පෙරටුගාමී සමාජවාදී පක්ෂය ඉල්ලා සිටින්නේ යැයි ද එම ලිපියේ වැඩිදුරටත් සඳහන් වේ.