(රවින්ද්‍ර ප්‍රභාත් නෙත්තසිංහ)

බේකරි නිෂ්පාදන මිළ වැඩිකිරීමකින් තොරව තිබූ මිළටම අළෙවි කිරීමට කටයුතු කරන බව පිට පළාත් බේකරි හිමියන්ගේ සංගමය කියයි.

එම සංගමයේ කැදවුම්කරු ගාමිණී කන්දේගෙදර මහතා අද (22) දහවල් නිකවැරටියේ දී පැවැති මාධ්‍ය හමුවකදී මේ බව පැවසීය.

ජනතාව ඉතාමත් අපහසුතාවයට පත්ව ඇති මෙම අවස්ථාවේ දී බේකරි නිෂ්පාදනවල මිළ වැඩිකිරීමෙන් වැළකී සිටින්නැයි රටේ සෑම බේකරි හිමියෙක්ම කටයුතු කරන ලෙස එම සංගමය ඉල්ලා සිටී.

කෙසේ වෙතත් අමුද්‍රව්‍ය මිළ ඉහල යාම හේතුවෙන් තමන්ට මිළ වැඩිකිරීමක් අත්‍යාවශ්‍ය වුවත් මෙය ඒ සදහා අවස්ථාව ලෙස නොසලකන බවද එම සංගමය කියයි.

කොවිඩ් වසංගත තත්ත්වය හමුවේ රට වසා අසීරුවට පත්ව ඇති පාරිභෝගික ජනතාවට සහ රජයට දක්වන සහයෝගයක් ලෙස මෙම තීරණය ගත් බව කන්දේගෙදර මහතා කීය.

බේකරි නිෂ්පාදන වල මිළ හෙට (23) සිට ඉහළ දැමීමට කටයුතු කරන බව සමස්ථ ලංකා බේකරි නිෂ්පාදකයින්ගේ සංගමය පසුගිය දා නිවේදනය කර තිබිණ.

ඡායාරූප පිට පළාත් බේකරි හිමියන්ගේ සංගමයේ කැදවුම්කරු ගාමිණී කන්දේගෙදර සහ එහි සාමාජික එම්.ඩී.ආර්. සමන්ත යන මහත්වරු මාධ්‍ය හමුවේදී