ශාන්ත ප්‍රදීප් කුමාර කුලරත්න

විදේශ රටක නිෂ්පාදිත ජීව අත්බෝම්බයක් සහ තියුණු ආයුධ දෙකක් සමග සංවිධානාත්මක අපරාධ කල්ලි සාමාජිකයෙකු  ඇතුළු දෙදෙනෙකු අද (03) දා අත්අඩංගුවට ගත් බව වැල්ලම්පිටිය පොලීසිය පවසයි .

මෙසේ අත්අඩංගුවට ගෙන ඇත්තේ "පොඩි විජේ" නමැති  අපරාධ රැසකට සම්බන්ධ පුද්ගලයකු බව පොලිසිය කියයි .

වැල්ලම්පිටිය සිංහපුර ප්‍රදේශයේ නිවාස තුනකට  පහරදී තර්ජනය කිරීමේ සිද්ධියක් සම්බන්ධයෙන් ඉකුත් 01 දා ලද පැමිණිල්ලකට අනුව  සිදු කළ විමර්ශනයකින් අනතුරුව සැකකරුවන් දෙදෙනෙකු මෙසේ අත්අඩංගුවට ගත් බව පොලීසිය පවසයි .

පසුව  සිදුකළ  වැඩිදුර විමර්ශනයකදී "පොඩි විජේ" නමැත්තා සන්තකයේ තිබී විදේශ රටක නිෂ්පාදිත ජීව අත්බෝම්බයක් සහ තියුණු ආයුධ දෙකක් පොලිස් භාරයට ගත් බව කියයි.

සැකකරු ඉකුත් වසර එකහමාරක පමණ කාලයක සිට සිදුකළ  අපරාධ රැසක්  සම්බන්ධයෙන් පොලිසිය සොයමින් සිටි පුද්ගලයකු බවද පැවසේ .

අත්අඩංගුවට ගත් සැකකරුවන් අධිකරණයට ඉදිරිපත් කිරීමට නියමිත අතර වැල්ලම්පිටිය පොලීසිය වැඩිදුර පරීක්ෂණ පවත්වයි.